Պորոշենկոն կարծում է, որ ռազմական դրությունը պետք է մտցվի ոչ թե 60, այլ 30 օրով

21:14 • 26.11.18

Ուկրաինայի նախագահ Պյոտր Պորոշենկոն հայտարարել է, որ կառաջարկի Գերագույն Ռադային երկրում իր կողմից սահմանված ռազմական դրությունը հաստատել ոչ թե 60, այլ 30 օրով, գրում է «ՌԻԱ Նովոստի» գործակալությունը:

Ըստ նախագահի՝ ռազմական դրության ռեժիմի ժամկետը մինչև մեկ ամիս կրճատելը նպատակ ունի չխաթարել 2019 թվականի սկզբին նախատեսվող նախագահական ընտրությունները:

«Ազգային անվտանգության խորհուրդն ինձ առաջարկեց ռազմական դրություն մտցնել 60 օրով... Ես կառաջարկեմ խորհրդարանին ռազմական դրություն մտցնել 30 օրով», - ասել է Պորոշենկոն:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով: Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին:

Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: