Ռուսական «Էքստրասենսների պայքարը» շոուի նախկին մասնակիցը պատմել է, որ իրեն նախագծի եզրափակիչ դուրս գալու համար առաջարկել են գումար վճարել

14:39 • 29.11.18

Ռուսական հայտնի «Էքստրասենսների պայքարը» («Битва экстрасенсов») հեռուստաշոուի նախկին մասնակիցներից մեկն անանունության սկզբունքով տված հարցազրույցում հայտարարել է, որ իրեն նախագծի եզրափակիչ փուլ դուրս գալու համար առաջարկել են գումար վճարել: Այս մասին հաղորդում է 360 հեռուստաալիքը:


«Քասթինգի փուլում տեղեկատվության գաղտնիության մասին համաձայնագրի ստորագրումից անմիջապես հետո ինձ առաջարկեցին «գնել» նախագծին իմ մասնակցությունը: Դա չորրորդ եթերաշրջանն էր, մասնակցության արժեքն այդ ժամանակ 450 հազար ռուբլի էր: Կարելի էր վճարել գումարը և դեռ քասթինգի փուլից հայտնվել եզրափակչում», - ասել է շոուի նախկին մասնակիցը:


Հեռուստաալիքի զրուցակիցը նաև ասել է, որ նախագծի բոլոր մասնակիցներին ղեկավարում են խմբագիրները. փորձություններից առաջ նրանց նախապես հայտնում են անհրաժեշտ տեղեկատվությունը:


Մասնակցի խոսքով՝ նախագծում իսկապես շատ մասնակիցներ են եղել, որոնք էքստրասենսորության հետ ոչ մի կապ չեն ունեցել: Տղամարդը հավելել է, որ միայն նախագծում հայտնվելն արդեն ապագայում մեծ գումարներ վաստակելու երաշխիք է:


«Եթե նկատել եք, նախագծի հաղորդավար Մարատ Բաշարովը զգուշացնում է հեռուստադիտողներին, որ չարժե էքստրասենսներին վճարել մասնավոր սեանսների համար, այսինքն՝ խորհուրդն ամեն դեպքում հնչում է»,- ասել է նա:


«Էքստրասենսների պայքարը» ռուսական հայտնի հեռուստաշոու է, որը ցուցադրվում է ТНТ հեռուստաալիքով: 2017թ.-ին նախագիծը ՌԴ գիտության և կրթության նախարարության կողմից կեղծ գիտության տարածման համար հակամրցանակի է արժանացել: