Այսօր կառավարության սուբսիդավորմամբ 8 %-ով մինչև 3 մլն դրամ տրվող գյուղատնտեսական վարկերը կդարձնենք 5 մլն դրամ. Նիկոլ Փաշինյան
Այսօր կառավարության սուբսիդավորմամբ 8 տոկոսով տրվող մինչև 3 մլն դրամանոց գյուղատնտեսական վարկերը կդարձնենք 5 մլն դրամ: Գեղարքունիքի մարզի Ճամբարակ համայնքում «Իմ քայլը» դաշինքի քարոզարշավի ժամանակ հայտարարեց վարչապետի պաշտոնակատար, դաշինքի 1-ին համար Նիկոլ Փաշինյանը:
«Մենք ուզում ենք քաջալերել, որ մարդիկ իրենց աշխատանքով հասնեն արդյունքների: Եթե այսօր Հայաստանում կան մարդիկ, որ առանց աջակցության հասել են ինչ-որ բանի, նշանակում է այդ հնարավորությունը կա: Մենք ՀՀ-ում ուզում ենք այնպիսի փոփոխություն անել, որ մարդիկ իրենց աշխատանքով կարողանան վաստակել և ապահովել իրենց ընտանիքի բարեկեցությունը: Մեր ամբողջ մտածածը հենց դա է, որ մարդիկ կարողանան ընտանիքով, համայնքով համախմբվել և իրար հետ մի գործ անել, և ազգովի համախմբվենք և մի գործ անենք»,-նշեց նա:
Աշխատանքը խրախուսելու համար, Նիկոլ Փաշինյանի խոսքով՝ կառավարությունը պատրաստվում է 2019 թ. կեսից ընդհանրապես հարկերից ազատել տարեկան 20 մլն դրամ շրջանառությունը չգերազանցող բիզնեսը: Ինչպես նաև անհատ տաքսու վարորդները կազատվեն լիցենզիայի վճարից: Այսօր նրանք ամսական 8000 դրամ են վճարում այդ տուրքի համար:
«Աղքատությունը ամոթ է, խարան է մեր երկրի երեսին: Ծայրահեղ աղքատությունը ՀՀ-ում ընդհանրապես պետք է վերացնենք, և սրա համար մենք 85 հազար թոշակառուի գումարները միանգամից 10 հազար դրամով ավելացրել ենք, որպեսզի նրանց թոշակը գոնե պարենային գծից վերև լինի»,- հայտարարեց Ն. Փաշինյանը:
Վարչապետի պաշտոնակատարը հույս հայտնեց, որ դեկտեմբերի 9-ին բոլորն անպայման կգնան ընտրական տեղամասեր և կկատարեն իրենց ընտրությունը:
«Կոչ եմ անում, խնդրում եմ, մինչև ընտրական տեղամաս ճանապարհն անպայման անցեք, որովհետև դա ձեր ճանապարհն է դեպի նոր Հայաստան, դեպի տնտեսական հեղափոխություն»,- ասաց նա:










