Սալոմե Զուրաբիշվիլին հայտարարել է, որ չի պատրաստվում աշխատել Սաակաշվիլիի օրոք կառուցված նախագահական պալատում

17:47 • 29.11.18

Վրաստանի նորընտիր նախագահ Սալոմե Զուրաբիշվիլին հայտարարել է, որ չի պատրաստվում աշխատել Թբիլիսիում Միխեիլ Սաակաշվիլիի օրոք կառուցված նախագահական պալատում, գրում է Interfax.ru-ն:


Զուրաբիշվիլիի հայտարարության համաձայն՝ նա ցանկանում է աշխատել Թբիլիսիի մեկ այլ թաղամասում, մասնավորապես՝ վրաց իշխան Օրբելիանիի նախկին պալատում, որը, նրա կարծիքով, ավելի համեստ և եվրոպական տեսք ունի:


«Եթե ուզում ենք եվրոպացի լինել, ապա այս պալատը փոքր-ինչ ավելի եվրոպական է, քան նախագահական մեծ շենքը, որն ինձ այլ բանի մասին է հիշեցնում», - նշել է նորընտիր նախագահը:


Վրաստանի նախագահական պալատը կառուցվել է նախկին նախագահ Սաակաշվիլիի նախաձեռնությամբ՝ 2004-2009 թվականներին: Պալատը գործող նախագահ Գիորգի Մարգվելաշվիլիի և իշխող «Վրացական երազանք» կուսակցության առաջնորդ Բիձինա Իվանիշվիլիի միջև վեճի պատճառ էր դարձել. վերջինս բազմիցս մեղադրել է Մարգվելաշվիլիին այն բանի համար, որ նա չի ուզում լքել նախագահական նստավայրը, որն իր մեծության պատճառով պետբյուջեի վրա թանկ է նստում:  


Հիշեցնենք, որ նոյեմբերի 28-ին Վրաստանում կայացած նախահագական ընտրությունների երկրորդ փուլի արդյունքում հաղթել է Սալոմե Զուրաբիշվիլին: