«Սա ուղերձ է Պուտինին, որ Ուկրաինայի դեմ ագրեսիան չենք հանդուրժելու». ԱՄՆ Սենատն ընդունել է Կերչի նեղուցում ՌԴ-ի գործողությունները դատապարտող բանաձև

12:13 • 30.11.18

ԱՄՆ Սենատը Կերչի նեղուցում Ռուսաստանի գործողությունները դատապարտող բանաձև է ընդունել, Հանրապետական կուսակցությունից Ռոն Ջոնսի և Դեմոկրատական կուսակցությունից Քրիս Մերֆիի ներկայացրած բանաձևն անցել է միաձայն, այս մասին հաղորդում է The Hill պարբերականը:

Քվեարկությունից հետո Ջոնսը հայտարարել է, որ նման քայլերով ՌԴ նախագահ Վլադիմիր Պուտինը «փորձում է Արևմուտքին»: Ըստ սենատորի՝ այս բանաձևով իրենք հաստատեցին իրենց պատրաստակամությունն աջակցելու ուկրաինացի ժողովրդին և իշխանություններին, ինչպես նաև Ուկրաինայի տարածքային ամբողջականությանը:

Իր հերթին Մերֆին շեշտել է, որ այսպիսով՝ Սենատը ցույց տվեց, որ չի հանդուրժի Ազովի ծովում Ուկրաինայի դեմ կիրառվող ագրեսիան:

«Սա ուղերձ է (Ռուսաստանի Դաշնության նախագահ Վլադիմիր) Պուտինին, որ Ազովի ծովում Ուկրաինայի դեմ ցուցաբերված ագրեսիան չի հանդուրժվելու»,- ասել է սենատորը՝ շեշտելով, որ իրենք խոստորեն դատապարտում են Ռուսաստանի ցանկացած ռազմական գործողություն, որն ուղղված է «միջազգային նորմերի միակողմանի փոփոխմանը»:

Ըստ բանաձևի հեղինակների՝ սա նաև կոչ է միջազգային հանրությանը՝ Կերչի նեղուցում Ռուսաստանի գործողություններին միասնաբար դիմագրավելու համար:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից Կերչի նեղուցում ռուսական ջրային սահմանի խախտման մասին: Արդյունքում ռուսական կողմը բեռնանավերով փակել է նեղուցը:

Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Այդ միջադեպից մեկ օր անց Ուկրաինան 30 օրով ռազմական դրություն է սահմանել երկրում: