Լավ են անում, խոսում են, որևէ մեկդ չփորձեք Արցախի վրա մատ թափ տալ. Է. Շարմազանովը՝ Արցախի իշխանությունների մեկնաբանություններին վերաբերյալ Ն. Փաշինյանի զգուշացման մասին

12:47 • 30.11.18

Արտահերթ խորհրդարանական ընտրություններին «Հանրապետական» կուսակցության  վեցերորդ համարը զբաղեցնող Էդուարդ Շարմազանովը քիչ առաջ Լոռու մարզից ֆեյսբուքյան իր էջի ուղիղ եթերում նշեց, որ այսօր մի շարք համայնքներում հանդիպումներ կունենա:

«Ի տարբերություն մեզ՝ մեր իշխանությունները գնում են ոչ թե ծրագրեր ներկայացնելու, այլ  գնում են ասֆալտին փռելու, վզներից բռնելու և մարդկանց ահաբեկելու ճանապարհով: Եկավ   գոռգոռաց գնաց»,-ասաց Էդուարդ Շարմազանովը և նշեց, որ օր-օրի մտահոգ քաղաքացիների քանակն է ավելանում և կոչ արեց քաղաքական ուժերին չխոսել այն մասին, ինչից չի հասկանում:

«Ասում է՝ ՀԱՊԿ գլխավոր քարտուղարի հարցն էական ու ամենակարևորը չէ։  Հիմա էլ զգացել ես, որ դեկտեմբերի 6-ին քո պատճառով Հայաստանին ճամփելու են ՀԱՊԿ գլխավոր քարտուղարի պաշտոնից, ասում ես՝ էական չէ՞։ Բա ի՞նչն է էական, 800 հազար քաղաքացիներին անբան ու լոդր անվանե՞լը, մատ թափ տալ, գնալ Ալավերդի խաբել, որ Թեղուտի ծրագի՞ր ունեք», - ասաց նա և նշեց, որ դա ուղղակի աբսուրդի թատրոն է:

«Ալիևն ու Էրդողանը Բաքվում միավորվում են, ջան-ջիգյար են անում, պանթուրքիզմ են անում ընդդեմ Հայաստանի ու հայության, իսկ ՀՀ ոչ բարով ղեկավարը մատ է թափ տալիս Արցախի Հանրապետության ղեկավարի և պաշտոնյաների վրա, այն մարդկանց վրա, որոնց մի մասը Արցախի հերոսներ են: Լավ են անում, խոսում են, որևէ մեկդ չփորձեք Արցախի վրա մատ թափ տալ, դուք գնացեք ձեր քաղաքական ծրագրերից խոսեք, որը զրո է»,-ասաց նա:

Հիշեցնենք, որ Ճամբարակում «Իմ քայլը» դաշինքի քարոզարշավին վարչապետի պաշտոնակատարը տարօրինակ համարեց ՀՀ խորհրդարանական ընտրությունների քարոզարշավին Արցախի իշխանությունների ներկայացուցիչների ակտիվությունը: «Ես հարցեր ունեմ և այդ հարցերը կքննարկեմ Արցախի նախագահ Բակո Սահակյանի հետ, իսկ մինչ այդ ես պարոն Սահակյանին հորդորում եմ, որ կարգի հրավիրի իր կառավարության ներկայացուցիչներին և իրենց ուղարկի իրենց աշխատանքով զբաղվելու: Արցախի նախագահի մամուլի խոսնակն օրումեջ իմ ասածի վերաբերյալ մեկնաբանություն է տալիս, այ քեզ բան: Սթափվեք, հարգելինե՛րս և զբաղվեք ձեր աշխատանքով»,- նշեց Նիկոլ Փաշինյանը: