Նիկոլ Փաշինյանն Արցախի ղեկավարության մասին խոսելիս պետք է մի քիչ տոնայնությունն իջեցնի, չի կարելի հանուն ընտրությունների սեպ խրել 2 երկրի ղեկավարների միջև. Արթուր Խաչատրյան
Այսօր Դավիթաշեն համայնքում նախընտրական քարոզարշավ անցկացրեց ՀՅԴ համամասնական ցուցակում ներկայացված, Արաբկիր, Աջափնյակ, Դավթաշեն համայնքներն ընդգրկող թիվ 2 ընտրատարածքում ռեյտինգային թեկնածու Արթուր Խաչատրյանը` շրջելով փողոցից փողոց, բակից բակ:
Լրագրողների հետ զրույցում, անդրադառնալով Հայաստանի տնտեսական վիճակին, գյուղատնտեսության նախկին նախարարը նշեց, որ եթե տարեկան հինգ տոկոս տնտեսական աճ ենք ունեցել, ապա այդ հինգ տոկոսը պետք է ազդեցություն ունենար մարդկանց սառնարանների վրա և հինգ տոկոսով ավել կարագ, պանիր, միս լիներ: «Տնտեսական աճին զուգահեռ՝ աճում է անհավասարությունը, այսինքն՝ ստեղծված արժեքը գնալով ավելի է կենտրոնանում մի քանիսի ձեռքին»,-ասաց նա:
Նա նշեց, որ թեև իշխանությունները նշում են, որ Հայաստանում այլևս օլիգարխիա չկա, բայց օլիգարխիան միայն ստվերը չէ, այլ նաև տնտեսության մեջ խոշոր արտադրողներն են: Արթուր Խաչատրյանը կարծում է, որ որոշ ընտրատարածքներում, որտեղ «Հանրապետականը» անցած ընտրություններին էական արդյունք է արձանագրել, պատկերը կփոխվի, որովհետև մարդիկ այդ օլիգարխների օգտին աշխատել են, իսկ հիմա էլ մյուսների օգտին են աշխատում:
«Ովքեր իրենց հավատարմության երդումը տվեցին «Հանրապետական» կուսակցությանը, այդ «օլիգարխ» ասվածները մայիս-հունիս ամիսներին ո՞ւմ տվեցին այդ հավատարմության երդումը»,-ասաց նա և նշեց, որ մեկին բռնելը հակակոռուպցիոն ռեֆորմ չէ և ինստիտուցիոնալ փոփոխություններ են պետք:
Թեկնածուն ասաց, որ գյուղերից ստանում են ահազանգեր` վարչական ռեսուրսի կիրառման վերաբերյալ: «Երբ գնում ես գյուղապետերի մոտ, նրանք ասում են, որ մեծ հաճույքով կուզեին քեզ հետ հանդիպման գալ, բայց ինձ էլ հասկացիր, ամսի իննից հետո ամսի տասն էլ կա»,-ասաց նա:
Արթուր Խաչատրյանը նշեց, որ իրական գաղափարական պայքար չի տեսնում մրցակից ուժերի միջև և ավելի շատ երկու կողմեր փորձում են իրար մեղադրել, սակայն գաղափարական, քաղաքական առումով նրանց ծրագրերում շատ մեծ տարբերություն չկա, նույն ազատական տնտեսությունն է, նույն Արցախի հարցի լուծումն է:
Ըստ նրա` դեռևս հետհեղափոխական իրավիճակի մեջ ենք, և էմոցիոնալ ֆոնը բավականաչափ բարձր է: Ինչ վերաբերում է «Դաշնակցության» ընտրազանգվածին, ապա նա ասաց, որ այնպես չէ, որ մարդ ծնվելուց քվեարկելու է «Դաշնակցության» օգտին, մեռնելուց էլ քվեարկելու է «Դաշնակցության» օգտին, բայց իրենք գաղափարական ուժ են:
Արթուր Խաչատրյանը կարծում է, որ Նիկոլ Փաշինյանը Արցախի ղեկավարության մասին խոսելիս պետք է մի քիչ տոնայնությունն իջեցնի, քանի որ չի կարելի հանուն ընտրությունների սեպ խրել երկու հանրապետությունների ղեկավարության միջև:










