Թուրքմենստանի նախագահը կառավարության նիստին է գնացել հեծանիվով

14:55 • 01.12.18

Թուրքմենստանի նախագահ Գուրբանգուլի Բերդիմուհամեդովը կառավարության նիստին հեծանիվով է գնացել, հաղորդում է կառավարության ռուսալեզու Нейтральный Туркменистан թերթը:


Ինչպես նշում է երկրի ղեկավարը՝ պարբերաբար սպորտով զբաղվելը լավ է անդրադառնում մարդու առողջության վրա:


«Այդ քայլով նախագահն օրինակ է ծառայում թուրքմենստանցիներին՝ ցույց տալով առողջ և ակտիվ ապրելակերպի բարերար ազդեցությունը», - գրում է թերթը:


«Օգուզխան» պալատական համալիրի, որտեղից ճանապարհ է ընկել նախագահը, և Թուրքմենստանի նախարարների գրասենյակի միջև հեռավորությունը մի քանի հարյուր մետր է:


ՄԱԿ-ի Գլխավոր վեհաժողովը 72-րդ նստաշրջանում Թուրքմենստանի նախաձեռնությամբ հունիսի 3-ն ընդունել է որպես Հեծանիվի համաշխարհային օր:


Այյժմ, պետության ղեկավարի նախաձեռնությամբ, երկրում աշխատանքներ են տարվում մայրաքաղաք Աշխաբադում Հեծանվի համաշխարհային օրվան նվիրված հուշարձան կանգնեցնելու ուղղությամբ: Հավանական է, որ հուշարձանը բացվի 2019 թվականի հունիսի 3-ին: