«Ռոսկոմնադզոր»-ը Google-ին տուգանել է 500 հազար ռուբլով

15:48 • 11.12.18

Ռուսաստանի կապի, տեղեկատվական տեխնոլոգիաների և զանգվածային հաղորդակցության վերահսկողության դաշնային ծառայությունը («Ռոսկոմնադզոր») ռուսական օրենսդրությունը խախտելու համար կես միլիոն ռուբլով տուգանել է ամերիկյան Google ընկերությանը, տեղեկացնում է ՏԱՍՍ գործակալությունը՝ ծառայության պետ Ալեքսանդր Ժարովի հայտարարությանը հղումով:

Ծառայությունն այդ որոշումն ընդունել է, քանի որ Google-ը հրաժարվել է միանալ Ռուսաստանում արգելված կայքերի ռեեստրին ու զտել դրանում ներառված տեղեկատվությունը:

Պաշտոնյայի խոսքով՝ Google-ի պատասխանում ասվում է, որ ընկերությունը կարծում է՝ իրենք հետևում են ռուսական օրենսդրությանը:

Սակայն ժարովը մանրամասնել է, որ ռուսական կողմի տվյալներով՝ անհերքելի ապացույցներ կան առ այն, որ  Google-ը չի զտում արգելված կայքերը:

Ժարովը զգուշացրել է, որ օրենսդրությունը խախտելու դեպքում «Ռոսկոմնադզոր»-ը կարող է Google-ի դեմ նոր վարչական գործեր հարուցել: