Մանվել Գրիգորյանին գրավով ազատ արձակելու միջնորդությունը մերժվեց, նրա կալանքը երկարաձգվեց երկու ամսով. պաշտպան

14:41 • 12.12.18

Երևան քաղաքի ընդհանուր իրավասության դատարանը երեկ քննում էր գեներալ Մանվել Գրիգորյանի խափանման միջոց կալանքը ևս երկու ամսով երկարաձգելու հարցը: Դատարանն այսօր վերադարձել է խորհրդակցական սենյակից և մերժել նրան գրավի դիմաց ազատ արձակելու վերաբերյալ միջնորդությունը:

Դատարանի որոշմամբ՝ քննիչի՝ Մանվել Գրիգորյանի կալանքը երկու ամսով երկարաձգելու միջնորդությունը բավարարվել է, գրավով Մանվել Գրիգորյանին ազատ արձակելու վերաբերյալ միջնորդությունը դատարանը մերժել է:

Այս մասին դատարանում լրագրողների հետ զրույցում ասաց Մանվել Գրիգորյանի պաշտպաններից Արսեն Մկրտչյանը:

«Որոշումը չեմ ստացել, մանրամասներին չեմ  կարող անդրադառնալ, ես հենց նոր դուրս եկա դատարանի մի դռնից, որը դատավոր Մարինե Մելքոնյանը դարձրել է ՀՔԾ-ի մասնաճյուղ, և դա շատ հաջող իր մոտ ստացվում է»,-ասաց պաշտպանը:

Հիշեցնենք, որ Մանվել Գրիգորյանին մեղադրանք է առաջադրվել ՀՀ ՔՕ-ի 235-րդ հոդվածի 2-րդ մասի՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը մի խումբ անձանց կողմից և ՔՕ-ի 179-րդ հոդվածի 3-րդ մասի 1-ին կետով՝ խոշոր չափերի յուրացում հատկանիշներով: Նրա նկատմամբ խափանման միջոց է ընտրվել կալանավորումը, Մանվել Գրիգորյանն իրեն առաջադրված մեղադրանքը չի ընդունում: