Արմեն Գևորգյանի նկատմամբ կալանքի միջնորդության քննությունն ավարտվեց, որոշումը կհրապարակվի վաղը
Արմեն Գևորգյանի նկատմամբ կալանքի միջնորդության քննությունն ավարտվեց։ Լրագրողների հետ զրույցում Գևորգյանի շահերի պաշտպան Էրիկ Ալեքսանյանը տեղեկացրեց, որ Արմեն Գևորգյանի գործով դատավորը որոշումը կհայտարարի վաղը։
Նշենք, որ նիստը հետաձգվել էր 2 ժամով, սակայն ընդմիջումից հետո էլ Արմեն Գևորգյանը մասնակցել է դատական նիստին, նիստի ավարտից հետո հեռացել է հետնամուտքով։
Հավելենք, որ մինչ դատական նիստի մեկնարկն Արմեն Գևորգյանը լրագրողների հետ զրույցում հայտարարել էր, որ ինքը ծանոթ է իրեն առաջադրված մեղադրանքին, սակայն այն չի ընդունում։
Հիշեցնենք, որ դեռ Արմեն Գևորգյանին 2018-ի օգոստոսին մեղադրանք է առաջադրվել արդարադատության իրականացմանը խոչընդոտելու համար՝ ՀՀ Քրեական օրենսգրքի 332-րդ հոդված 3-րդ մասով, որը միացվել է 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործին: Արմեն Գևորգյանի նկատմամբ որպես խափանման միջոց էր ընտրվել ստորագրություն չհեռանալու մասին։
Նրա մեղադրանքը այժմ լրացվել է։ Նրան մեղադրանք է առաջադրվել ՀՀ ՔՕ-ի 38-300.1 հոդվածի՝ սահմանադրական կարգի տապալմանն օժանդակելը, 311-րդ հոդվածի 4-րդ մասի 2-րդ կետի՝ առանձնապես խոշոր չափերով կաշառք վերցնելը, ինչպես նաև ՔՕ-ի 190-րդ հոդվածի 3-րդ մասի 1-ին կետի հատկանիշներով՝ հանցավոր ճանապարհով ստացված գույքն օրինականացնելը՝ առանձնապես խոշոր չափերով։










