CNN-ը հրապարակել է Մոսկվայում Trump Tower-ի կառուցման մասին ԱՄՆ նախագահի ստորագրած փաստաթղթի կադրերը

15:53 • 19.12.18

Ամերիկյան CNN հեռուստաալիքը հրապարակել է ԱՄՆ նախագահ Դոնալդ Թրամփի ստորագրած մի փաստաթուղթ, որը վերաբերում է Մոսկվայում Trump Tower երկնաքերի կառուցմանը:

Հեռուստաալիքի հաղորդավար Քրիս Կուոմոն հայտնել է, որ նշյալ փաստաթղթում խոսվում է աշտարակի կառուցման աշխատանքները շարունակելու մտադրության մասին:

CNN-ի ուղիղ եթերում ցուցադրվել են նաև փաստաթղթի կադրերը: Առայժմ հայտնի չէ, թե ինչ աղբյուր է փոխանցել դրանք հեռուստաալիքին:

«Այսօր փաստերը հակասում են այն պատմությանը, որին ԱՄՆ նախագահ Դոնալդ Թրամփը ցանկանում է, որ հավատանք», - ասել է հաղորդավարը:

Թրամփի փաստաբան Ռուդոլֆ Ջուլիանին պարբերաբար հայտարարել է, որ նախագահը երբևէ չի ստորագրել նման փաստաթուղթ: