«Նրանք հույս ունեին, որ ուկրաինացի նավաստիներից մեկը կմահանա». Պուտինը՝ Կերչի նեղուցում Ուկրաինայի գործողությունների մասին

14:09 • 20.12.18

ՌԴ նախագահ Վլադիմիր Պուտինն իր ամենամյա մեծ մամուլի ասուլիսի ժամանակ Կերչի նեղուցում վերջերս տեղի ունեցած միջադեպն անվանել է սադրանք, որն ուղղված էր Ուկրաինայի գործող իշխանությունների վարկանիշի բարձրացմանը նախագահական ընտրություններին ընդառաջ:


«Սադրանքը միշտ վատ է, այդ ամենն ուղղված է առկա իրավիճակի սրմանը: Հասկանալի է, որ այնտեղ ընտրություններ են, հարկավոր է բարձրացնել թեկնածուներից մեկի վարկանիշը, բայց դա վատ է: Իսկ հաջողվեց սադրանքը, թե ոչ՝ վարկանիշի բարձրացման համար գուցե այո», - ասել է Պուտինը՝ նկատելով, որ Կերչի միջադեպից հետո Ուկրաինայի գործող նախագահ Պյոտր Պորոշենկոյի վարկանիշը բարձրացել է մինչև 12 տոկոս: ՌԴ նախագահը շեշտել է, որ հարևան երկրի իշխանությունները փաստացի հասան դրան սեփական երկրի շահերի ոտնահարման հաշվին:

«Դա վարկանիշի բարձրացման վատ տարբերակ է», - նշել է Պուտինը:

Ըստ նրա՝ ուկրաինական կողմը Կերչի նեղուցում սադրանք է նախաձեռնել՝ նախապես հաշվարկելով, որ ուկրաինացի ծովայիններից մեկը կմահանա, և այդպիսով՝ նրանք միջազգային մեծ աղմուկ կկարողանան բարձրացնել:

«Նրանք հույս ունեին, որ նրանցից մեկը կմահանա: Փառք Աստծո, դա տեղի չունեցավ: Այժմ քննություն է ընթանում, դրանից հետո պարզ կլինի, թե ինչ կլինի նրանց հետ», - ասել է ՌԴ նախագահը կալանավորված 24 նավաստիների մասին:


Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով:


Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին: Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:


Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: Դրա հետևանքով վիրավորվել է 3 ուկրաինացի զինծառայող: