Ամերիկացի սենատորները կոչ են արել Թրամփին վերանայել Սիրիայից ամերիկյան զորքի դուրսբերման որոշումը
Մի խումբ ամերիկացի սենատորներ նամակ են հղել ԱՄՆ նախագահ Դոնալդ Թրամփին՝ կոչ անելով վերանայել Սիրիայից ամերիկյան զորքի դուրսբերման մասին որոշումը: Քաղաքական գործիչները կարծում են, որ այդ քայլը կնպաստի տարածաշրջանում Ռուսաստանի և Իրանի դիրքերի ամրապնդմանը, գրում է ТАСС գործակալությունը:
Հայտնի է, որ նամակին միացել են թե՛ Դեմոկրատական, թե՛ Հանրապետական կուսակցությունների անդամ սենատորներ:
«Ինչպես գիտեք՝ Իրանն ու Ռուսաստանն օգտագործել են հակամարտությունը տարածաշրջանում իրենց ազդեցությունն ուժեղացնելու համար: ԱՄՆ-ի կողմից թուլության ցանկացած դրսևորում, որ կնկատվի Իրանի ու Ռուսաստանի կողմից, կհանգեցնի նրան, որ նրանք կմեծացնեն իրենց ներկայությունը տարածաշրջանում, իսկ մեր դաշնակիցների և գործընկերների վստահությունը մեր հանդեպ կնվազի»,- նշված է նամակում:
Բացի այդ, սենատորները համոզված են, որ իրավիճակից կարող է օգտվել նաև «Իսլամական պետություն» ահաբեկչական խմբավորումը, որը կարող է վերականգնել կամ ուժեղացնել իր գործունեությունը տարածաշրջանում:
Նամակի հեղինակները նաև զգուշանում են, որ ամերիկյան զորքի դուրսբերումը Սիրիայից ձեռնտու կլինի այդ երկրի նախագահ Բաշար ալ Ասադի համար, որը միջոցներ կձեռնարկի իր իշխանությունը երկրում ամրապնդելու համար:
Հիշեցնենք, որ նախօրեին ԱՄՆ նախագահը կարգադրել է դուրս բերել Սիրիայից այնտեղ գործող բոլոր 2000 ամերիկացի զինվորականներին: Ըստ Թրամփի՝ նրանց միակ նպատակն ԻՊ ահաբեկիչների դեմ պայքարն էր, որն էլ իրենք ամբողջապես ի կատար են ածել:










