Անկարայում մեկնարկել է ՌԴ դեսպան Կառլովի սպանության գործով առաջին դատական նիստը

12:40 • 08.01.19

Թուրքիայում մեկնարկել է 2016 թվականի դեկտեմբերին Անկարայում ռուս դեսպան Անդրեյ Կառլովի սպանության գործով առաջին դատական նիստը, փոխանցում է ռուսական «ՌԻԱ Նովոստի» գործակալության թղթակիցը:

Գործը քննում է Անկարայի առանձնակի ծանր հանցագործությունների թիվ 2 դատարանը:

Ավելի վաղ թուրքական դատախազությունը դատարանին էր փոխանցել Կառլովի սպանության գործը՝ 28 կասկածյալների դեմ մեղադրական ակտերով, նրանց թվում է նաև ամերիկաբնակ թուրք կրոնական քարոզիչ Ֆեթուլլահ Գյուլենը, որին Թուրքիայի իշխանությունները նաև մեղադրում են 2016 թվականի հուլիսի 15-ի ռազմական հեղաշրջման փորձի կազմակերպման համար:

Այսօր մեղադրյալների աթոռին է գտնվում 18 հոգի, այդ թվում՝ 1 կին: Մեղադրյալներից 4-ը մասնակցում են դատական նիստին առցանց հեռարձակման միջոցով՝ Թուրքիայի տարբեր շրջաններում գտնվող բանտերից:  

Ինչպես ավելի վաղ հայտնել է Tert.am-ը, Թուրքիայում ՌԴ դեսպանի դեմ հարձակումն իրականացվել է 2016թ.-ի դեկտեմբերի 19-ին Անկարայում տեղի ունեցած լուսանկարչական ցուցահանդեսի ժամանակ:

Մարդասպան Մևլութ Մերթ Ալթընթաշը, որը նախքան այդ 2,5 տարի աշխատել է ոստիկանությունում, սպանվել է դեպքի վայր ժամանած իրավապահների կողմից: