Օդի աղտոտվածությունը մոտ 2 տարով կկրճատի երեխաների կյանքը. հետազոտություն

Մեր օրերում ծնված երեխաների կյանքի տևողությունն աշխարհով մեկ տարածված թունավոր օդը շնչելու հետևանքով միջինը կկրճատվի 20 ամսով. վատագույն արդյունքը կգրանցվի հարավասիական երկրներում, որտեղ երեխաների կյանքի միջին տևողությունը կկրճատվի 30 ամսով:

Ինչպես նշում է The Guardian-ը, այս են փաստում State of Global Air (SOGA) 2019 խոշոր հետազոտության արդյունքները, համաձայն որոնց՝ Աֆրիկայում այդ ցուցանիշը կկազմի 24, Ասիայի արևելքում՝ 23 ամիս:

«Երեխաների կյանքի տևողության էական կրճատումն արագ տեղի կունենա, և դա շոկային է: Այս հարցում որևէ կախարդական փայտիկ չկա, պարզապես երկրների կառավարությունները պետք է գործի անցնեն»,-նշել է հետազոտությունն անցկացրած Առողջության վրա ազդեցության ինստիտուտի փոխնախագահ Ռոբերտ O’Քիֆը:

Ըստ մասնագետների՝ օդի աղտոտվածության բարձր մակարդակը դառնում է նորածինների՝ նորմայից ցածր քաշով, թերզարգացած թոքերով ծնվելու, ինչպես նաև մանկական ասթմայի զարգացման պատճառ:

Հետազոտության արդյունքների համաձայն՝ օդի աղտոտվածությունը դառնում է մարդկանց մոտ թոքերի քրոնիկ օբստրուկտիվ հիվանդության, 2 տիպի դիաբետի, թոքերի քաղցկեղի, սրտի իշեմիկ հիվանդության, կաթվածի պատճառ:

Հետազոտության հեղինակները պարզել են, որ 2017թ. գրանցված մահվան ամեն տասը դեպքից մեկն ունեցել է օդի աղտոտվածության հետ կապված պատճառ: