Օգտատերերը բողոքում են, որ Samsung-ի 2000 դոլարանոց ճկվող սմարթֆոններն օգտագործումից մի քանի օր անց կոտրվել են

Հարավկորեական Samsung տեխնոլոգիական ընկերության վերջերս ներկայացրած Galaxy Fold նորարարական ճկվող հեռախոսները, որոնց գինը 2000 դոլար է, դժգոհություն են առաջացրել որոշ օգտատերերի մոտ:

Ինչպես նշում է Daily Mail-ը, ոմանց պնդմամբ՝ թանկարժեք հեռախոսները կոտրվել են օգտագործվելուց մի քանի օր անց:

Աղբյուրը մանրամասնում է, որ ընկերությունը նախքան սարքը պաշտոնապես վաճառքի հանելը սմարթֆոնի մի քանի նմուշ բաժանել է լրագրողներին: Դժգոհողներն էլ հենց նրանք են: 

Նրանք բողոքել են, որ հեռախոսների ճկվող էկրանների պաշտպանիչ թափանցիկ թաղանթը հեռացնելուց հետո, էկրանն արագ վնասվել է: Ավելի ուշ պարզվել է, որ թաղանթներն իրականում չպետք է հեռացվեին, սակայն ընկերությունն այդ մասին լրագրողներին չէր նախազգուշացրել:

Bloomberg-ի լրագրող Մարկ Գուրմանը պատմել է, որ թաղանթը հեռացնելուց հետո Galaxy Fold-ը սկսել է տարօրինակ վատ աշխատել ու ի վերջո անպետք է դարձել:

«Երկու օր անց իմ Galaxy Fold-ն ամբողջովին կոտրված է ու ենթակա չէ օգտագործման»,-գրել է Գուրմանը Twitter-ում:

Յութուբյան օգտատեր Մարկիզ Բրաունլին ևս բողոքել է, որ թաղանթը հեռացնելուց հետո հեռախոսի հետ խնդիրներ են առաջացել:

Մինչդեռ The Verge տեխնոլոգիական կայքի խմբագիր Դիթեր Բոնը նշել է, որ ինքը թաղանթը չի հեռացրել, սակայն իրեն տրված սմարթֆոնի էկրանը ևս կոտրվել է: CNBC-ի լրագրողը ևս նույն բողոքն է ունեցել:

Պարբերականը նկատում է, որ այս ամենը լուրջ հարցեր է առաջացնում առ այն՝ արդյոք Galaxy Fold-ը հնարավոր կլինի նորմալ օգտագործել: 

Հատկանշական է, որ նախքան սմարթֆոնի պաշտոնական շնորհանդեսը Samsung-ը հայտարարել էր, որ ճկվող էկրանը փորձարկվել է ավելի քան 200 000 անգամ և որ այն անխափան է աշխատում:

Ճկվող հեռախոսը, որն աշխարհում ամենաթանկ մոդելներից է, վաճառքում կհայտնվի ապրիլի 26-ից: