Ավստրալացի գիտնականները Երկիր մոլորակի վրա քաղաքակրթության մոտալուտ վախճան են կանխատեսել՝ կապված գլոբալ տաքացման հետ

Ավստրալական Breakthrough կլիմայի վերականգնման ազգային կենտրոնի փորձագետները զեկույց են հրապարակել, որում նշվում է, որ կլիմայական փոփոխությունների պատճառով մարդկային քաղաքակրթությունը կարող է վերանալ մինչև 2050թ.-ը:

Զեկույցի հեղինակներից մեկի խոսքով՝ մարդու գործունեության հետևանքով առաջացող գլոբալ տաքացումը միջուկային պատերազմից հետո Երկիր մոլորակի վրա կյանքի համար ամենամեծ վտանգն է:

Գիտնականների համոզմամբ՝ եթե ամբողջ աշխարհի կառավարությունները հրաժարվեն էներգիայի այլընտրանքային աղբյուրի որոնումներից, մինչև 2030թ.-ը օրգանական հանածո վառելիքի այրումից ածխաթթու գազի արտանետումները կարող են առավելագույն նշանակության հասնել: Նման սցենարի համաձայն՝ մինչև 2050թ.-ը օդի միջին ջերմաստիճանը կբարձրանա 3 °C-ով:

Նման փոփոխությունն իր հերթին կբերի սառցային ծածկույթի վերացման, լուրջ երաշտի և Ամազոնի խոնավ անտառների ոչնչացման: Աշխարհում մշտապես ջրհեղեղներ և անտառային հրդեհներ կլինեն, ամբողջական էկոհամակարգեր կոչնչանան, մոլորակի գրեթե մեկ երրորդն անապատի կվերածվի:

Կլիմայական փոփոխությունները ռեսուրսների համար լուրջ զինված հակամարտությունների կհանգեցնեն, իսկ «կլիմայական փախստականների» թիվը կարող է գերազանցել մեկ միլիարդը:

Գիտնականների խոսքով՝ այս ամենը կհանգեցնի մեր պատկերացմամբ մարդկային քաղաքակրթության վախճանի: Զեկույցում ընդգծվում է, որ աղետից խուսափելու համար հարկավոր է անհապաղ միջոցներ ձեռնարկել: