ՆԱՍԱ-ն Մարսի վրա կյանքի գոյության հավանական նախանշաններ է հայտնաբերել

ԱՄՆ ավիատիեզերական գործակալության՝ ՆԱՍԱ-ի Curiosity սարքը, որը 2012թ. ի վեր ուսումնասիրում է Մարսի մակերևույթը, մոլորակի օդում մեծ քանակությամբ մեթան գազ է հայտնաբերել, ինչը կարող է վկայել կյանքի գոյության, մասնավորապես՝ մանրէների առկայության մասին:

Այս մասին գրում է The New York Times-ը՝ մանրամասնելով, որ Երկրի վրա մեթան գազն արտազատում են կենդանի օրգանիզմները:

Մարսագնացն այս տեղեկությունը Երկիր է ուղարկել անցած հինգշաբթի, իսկ հաջորդ օրը գիտնականներն արդեն ոգևորված քննարկելիս են եղել ուշագրավ փաստը:

Միևնույն ժամանակ, մասնագետները չեն բացառել, որ հայտնաբերված գազը կարող էր միլիոնավոր տարիներ գտնվել մոլորակի ներսում և միայն հիմա դուրս գալ անցքերից ու ճաքերից: