Տյումենում տղամարդու որովայնի խոռոչից 15 կգ քաշով ուռուցք են հեռացրել, որի գոյության մասին նա չի իմացել

ՌԴ Տյումենի մարզի ուռուցքաբանական հիվանդանոցում վիրաբույժները վիրահատել են որովայնի խոռոչի 15 կիլոգրամանոց ուռուցքով տղամարդու, որը տեղյակ չի եղել ուռուցքի գոյության մասին, հաղորդում է ria.ru-ն՝ վկայակոչելով առողջապահության մարզային վարչությանը:

Գերատեսչության տեղեկատվության համաձայն՝ տյումենցին կարծել է, թե նա պարզապես ավելորդ քաշ է հավաքում, սակայն վերջին շրջանում դժվարացել է պահպանել սովորական կենսակերպը և որոշել է դիմել բժիշկների օգնությանը: 

«Մեզ է դիմել որովայնի խոռոչի և հետորովայնային տարածության հսկայական ուռուցքով՝ լիպոսարկոմայով մի տղամարդ։ Ուռուցքը բաղկացած էր ճարպային հյուսվածքից և իրենից ներկայացնում էր երկու հսկայական հանգույց, որոնց ընդհանուր զանգվածը 15 կիլոգրամ էր։ Գոյացությունը զբաղեցրել էր գրեթե ողջ որովայնի խոռոչը և տարածվել դեպի հարևան օրգաններ»,- ասված է վիրաբուժության բաժնի ղեկավար Եվգենի Ֆրանկի հաղորդագրության մեջ:

Մասնագետի խոսքով՝ վիրահատությանը մասնակցած երեք վիրաբույժները դժվարությամբ են կարողացել մոտենալ անհրաժեշտ անոթներին: Ընդ որում՝ ստիպված են եղել մշտապես բարձրացնել և պահել գոյացությունը, ինչը բարդացել է նրա քաշի պատճառով: Վիրահատությունը տևել է 10 ժամ: Բժիշկները հաջողությամբ հեռացրել են ուռուցքը: