Առաջին անգամ Հայաստանում մի սեղանի շուրջ հավաքվեցին բոլոր ընդդիմադիր ուժերը. Նարեկ Սամսոնյանը՝ «Վերնատուն» ակումբի միավորիչ հավաքի մասին (տեսանյութ)

«Վերնատուն» ակումբի կազմակերպիչները, հիմնադիրները սահմանել են քաղաքական հարթակ, որտեղ հնարավոր կլինի խոսել երկրի առջև ծառացած խնդիրների մասին, շատ լավ ու կարևոր նախաձեռնություն է, որովհետև առաջին անգամ Հայաստանում մի սեղանի շուրջ հավաքվեցին բոլոր ընդդիմադիր ուժերը, որոնք այսօրվա քաղաքական իշխանության օրոք ընդդիմություն են: Այս մասին Tert.am-ի հետ զրույցում ասաց «Քաղաքացիական գիտակցություն» հասարակական կազմակերպության նախագահ Նարեկ Սամսոնյանը՝ ամփոփելով «Վերնատուն» հասարակական-քաղաքական ակումբի միավորիչ հավաքը, որին ինքը ևս մասնակցել է:

Հավաքին խորհրդարանական ընդդիմության բացակայությունը Սամսոնյանը պարզաբանեց հետևյալ կերպ. «Եթե քաղաքացիները համարում են խորհրդարանական ընդդիմությանը ընդդիմություն, եկեք մենք էլ համարենք, սակայն ես վստահ եմ, որ քաղաքացիների մեծամասնությունն այդ մարդկանց ընդդիմադիր ուժ չի համարում: Ես առիթ ունեցել եմ ասել՝ ԼՀԿ-ն չի կարող ընդդիմադիր ուժ դիտարկվել, ԲՀԿ-ում կան մի քանի անհատներ, որոնք իրոք ընդդիմադիր են, բայց ԲՀԿ-ին էլ չի կարելի դիտարկել այնպիսի ընդդիմադիր, որը հավակնում է իշխանություն վերցնել, դա անհեթեթ է»,- ասաց նա և նշեց, որ սիմվոլիզմը դրանում է կայանում, որ այդ ուժերը ներկա չեն եղել:

Նարեկ Սամսոնյանը նշեց, որ շատ արտախորհրդարանական ուժեր չկային հավաքին: «Այնպես չէ, որ Հայաստանում ինչ-որ մեկի համար գաղտնիք է, որ խորհրդարանում գոյություն չունի ընդդիմություն: Նիկոլ Փաշինյանի կարծիքով՝ դա առավելություն է, բայց դա իր ամենամեծ ողբերգությունն է և իր իշխանությանը սպառնացող թիվ մեկ վտանգը: Պառլամենտական համակարգ ունեցող երկրում ԱԺ-ում ընդդիմության բացակայությունը, ինչին ամեն գնով նրանք հասան, օրինակ՝ ՀՀԿ-ին ԱԺ չթողնելով, հղի է շատ վտանգավոր քաղաքական ճգնաժամով: Երբ ընդդիմադիր ալիքները ԱԺ չեն հասնում, պայթելու են դրսում, ինչը շատ վտանգավոր է»,- շեշտեց նա:

Անդրադառնալով «Վերնատուն» ակումբի հիմնադիր Վազգեն Մանուկյանի հայտարարությանը՝ թե հավաքին պետք է լինեին և՛ ընդդիմության, և՛ իշխանության ներկայացուցիչները, նա ասաց. «Կլինի արդյո՞ք այդպիսին «Վերնատուն» ակումբը, դա արդեն Վազգեն Մանուկյանի և մնացած հիմնադիրների խնդիրն է: Գուցե նրանք կարողանան հասնել դրան, եթե ոչ այսօրվա, ապա վաղվա իշխանություններն այդ ակումբում կկարողանան գործունեություն ծավալել»,-ասաց նա և բացառեց դրա հավանականությունն այսօրվա իշխանությունների պարագայում:

 «Այսօրվա իշխանությունը բացառում եմ, քանի որ այսօրվա իշխանությունը որևէ իրական ընդդիմության հետ աշխատելու ցանկություն չունի: Անգամ ԱԺ-ում, երբ քիչ թե շատ ընդդիմադիր խոսք է հնչում, օրինակ՝ Գևորգ Պետրոսյանի կողմից, տեսնում ենք, թե ինչպիսի փողոցային մակարդակի արձագանքներ են հնչում: Այս մարդիկ չեն սիրում ընդդիմություն, այս մարդիկ չեն կարող ընդդիմության հետ շփվել, նրանք ընդդիմությանը անվանարկելու են, անուն են կպցնելու: Ես չեմ պատկերացնում՝ ինչպես կարելի է նստել մի սեղանի շուրջ մարդու հետ, որը քեզ ասում է՝ դու լափից կտրվել ես, եթե դու դեմ ես սրան, եթե դու Ղարաբաղի հարցում իրեն չես վստահում, ուրեմն դու դավադիր ես: Ես չեմ պատկերացնում այս մարդիկ ինչպես կարող են մի սեղանի շուրջ նստել և քննարկել որևէ օրակարգ, դա մի քիչ դժվար պատկերացնելի է»,- հայտարարեց Սամսոնյանը::

Ըստ Նարեկ Սամսոնյանի՝ այսօր Հայաստանում քաղաքական հայտի խնդիր գոյություն ունի և նա ցանկանում է, որ «Վերնատուն» ակումբը քաղաքական հայտ ներկայացնի: «Մենք ունենք իշխանություն, իշխանության սատելիտներ՝ տարատեսակ անձանց և կուսակցությունների տեսքով, որպես քաղաքացիական հասարակություն հորջորջվող մարմիններ, որոնք գնում են Նիկոլ Փաշինյանի մամուլի խոսնակի միջանցքներում քննարկումներ են անում, բայց մենք չունենք երկրորդ քաղաքական ռեյտինգի հավակնող ուժ կամ ուժեր: Քաղաքական հայտի բացակայությունը բավական վտանգավոր է դարձնում նաև քաղաքական մշակույթի ձևավորումը: Երբ չկա այդ երկրորդ ռեյտինգը, երբ չկա ուժ, կենտրոն, որ ասում է՝ ես գալիս եմ և ես համարում եմ, որ Նիկոլ Փաշինյանը իշխանությունը պետք է թողնի ու գնա, այդ պարագայում Նիկոլ Փաշինյանի ռեյտիգնի անկմանը զուգահեռ երկրորդ ռեյտինգ չի բարձրանում: Այստեղ ավելի վտանգավոր է դառնում, որովհետև ավելի քաոսային վիճակ է ստեղծվելու ու ստեղծում է  հասարակության շրջանում, քան այն, երբ լինեն հստակ կենտրոններ, որոնք որ պետք է գան փոխարինելու, ունենան այդ հայտը»,- ասաց նա:

Հարցին՝ ինչպե՞ս է պատկերացնում ակումբը քաղաքական հայտ ներկայացնի, քանի որ տարբեր կուսակցությունների նրեկայացուցիչներ են այնտեղ, Սամսոնյանը պատասխանեց. «Խոսքը չի վերաբերում կոնկրետ կուսակցական գործիչներին, բայց եթե տեռորիստները կարող են քաղաքական հայտ ներկայացնել, եթե «Սասնա ծռեր» տեռորիստական խումբը կարող է դառնալ քաղաքական կուսակցություն, եթե Նաիրի Հունանյանին կարող  է ինչ-որ մեկը դարձնել քաղաքական գործոն, ինչո՞ւ չի կարող քաղաքական ակումբը՝ կազմված բավականին փորձառու քաղաքական գործիչներից, իր տեսլականը ներկայացնել և քաղաքական հայտի տեսքով ձևակերպել, ստանալ իքս մարդկանց հավանությունը, ստվերային կաբինետի ձևավորում լինի, կամ դառնա այն կենտրոնը, որի շուրջ կկարողանան համախմբվել տարբեր մարդիկ»:

Ըստ Սամսոնյանի՝ «Վերնատուն» ակումբում հավաքված են մարդիկ, որոնք բավականին լուրջ ներդրում են ունեցել Հայաստանի երրորդ հանրապետության ստեղծման և կայացման գործում: «Այդտեղ կարողացել են համախմբել մարդկանց, որոնք դեմ են այս իշխանություններին, որոնք նրանց կողմից հռչակված հեղափոխություն երևույթը չեն ընդունում, որոնք ասում են՝ կա ատելություն և «բոլորը մինուս մեկ»-ի անհրաժեշտություն կա: Երբ ասում եմ՝ «Վերնատունը» քաղաքական հայտ պետք է ներկայացնի, դա պետք է լինի մեկը, բայց այդ ակումբն այսօր կարողացել է դաշտում համախմբել գրեթե բոլոր ընդդիմադիր ուժերին»,- ասաց նա: