Նախկինում նման հանդիպումներ չէին լինում, չկար ՀՀ համաձայնությունը, հիմա հայկական կողմը լեգիտիմացրել է դրանք․ միջազգայնագետը՝ ԼՂ «ադրբեջանական համայնքի» ղեկավարի հետ Իրանի դեսպանի հանդիպման մասին

Ես կարծում եմ՝ այս իրադարձությունները չեն դառնում քննարկման թեմա, որովհետև այն կողմը, որը պետք է հակադարձեր այս թեմաներին, առանձնապես չի ցանկանում, որ սրանք դառնան քննարկման առարկա և հակընդդեմ փաստարկներ չի բերում քննադատներին, թե ինչու են այսպիսի իրադարձություններ տեղի ունենում մեր երկրի մասնակցությամբ՝ տարբեր ուղղություններով: Սա, կարծում եմ, հիմնական պատճառն է, որ իշխանությունները լուռ են:

Այս մասին Tert.am-ի հետ զրույցում ասաց միջազգայնագետ Սուրեն Սարգսյանը՝ անդրադառնալով Հայաստանի և Արցախի Հանրապետության միջև նոր ճանապարհի կառուցման վերաբերյալ Եվրախորհրդարանում ընդունված համատեղ հայտարարությանը, Թեհրանում Հայաստանի դեսպանատան դիմաց տեղի ունեցած ցույցին, Իրանի դեսպանի՝ «Ղարաբաղի ադրբեջանական համայնքի» ներկայացուցչի հետ հանդիպմանը:

«Նման հարցերն անտարբերության մատնելը նշանակում է խնդիրը չտեսնել, և չտեսնել, թե այդ խնդիրն ինչքան կարող է մեծանալ և ինչ հետևանքներ կարող է ունենալ: Ճիշտ ռազմավարություն չէ, եթե ընտրել են իրադարձությունները չմեկնաբանելու ու ամբողջ արտաքին քաղաքականության բեռը արտգործնախարարի վրա թողնելու ճանապարհը: Արտաքին քաղաքականության միակ պատասխանատուն ԱԳ նախարարը չէ, նա արտաքին քաղաքականության սպասարկման գործիքներից մեկն է: Նման գործիքներ են նաև Կառավարությունը, պետության ղեկավարը, ԱԺ-ն, այնպես որ, չպետք է ամբողջ մեղքը դնել ԱԳ նախարարի վրա: Մենք ունենք լուրջ խնդիրներ, և դրանք միայն ԱԳ նախարարության միայնակ ուժերով լուծվելու հեռանկար չունեն»,-ասաց Սարգսյանը:

Նրա խոսքով՝ այս իրադարձություններին ներքաղաքական դաշտում արձագանք չտալը նշանակում է հանրությանը «բանի տեղ չդնել», ժողովրդի հետ անկեղծ չլինել և բաց ու շիտակ չներկայացնել այն խնդիրներն ու բացերը, որոնք կան: «Սա բերելու է բացասական հետևանքների, որովհետև իշխանությունը խոստացել էր, որ թափանցիկ և հաշվետու է լինելու ժողովրդի առջև, ինչը մենք չենք տեսնում՝ առնվազն արտաքին քաղաքականության մասով»,-ասաց Սարգսյանը:

Վերոնշյալ իրադարձություններին առանձին անդրադառնալով՝ միջազգայնագետը նշեց, թե դրանցից յուրաքանչյուրի դեպքում եղել են կոնկրետ պատճառներ:

Նրա դիտարկմամբ՝ ԵԽ հայտարարության պատճառն այն է, որ ԵԽ-ի հետ ակտիվ աշխատանք չի տարվել: «Ակտիվ աշխատանքի տապալումն էլ բերել է այս իրավիճակին: Մենք ԵԽ-ում կարող էինք շատ ավելի արդյունավետ աշխատել և նման ձևակերպումներից կկարողանայինք խուսափել»:

Ինչ վերաբերում է Իրանում ՀՀ դեսպանատան դիմաց տեղի ունեցած ցույցին, որի ընթացքում ակցիայի մասնակիցները ՀՀ-ից պահանջել են խզել դիվանագիտական հարաբերությունները Իսրայելի հետ, Սարգսյանն ասաց, թե ՀՀ-ն ու Իսրայելն ունեն դիվանագիտական հարաբերություններ, բայց նաև պետք է հաշվի առնել մեր բարեկամ Իրանի դիրքորոշումը՝ այս հարցի վերաբերյալ:

«Պետք էր մինչ այդ աշխատել Իրանի հետ, հստակ ներկայացնել, թե ինչի համար է պետք ռեզիդենտ դեսպանը, հիմնավորել: Կարծում եմ՝ Իրանի հետ աշխատել են 1-2 դիվանագիտական խողովակով, իսկ դա բավարար չէ, որ նման հարցերը կարգավորվեն: Պետք էր աշխատել տարբեր ուղղություններով՝ անհրաժեշտության դեպքում՝ մեր համայնքի միջոցով: Նաև պետք է կայանային երկկողմ բարձր մակարդակի շփումներ ոչ միայն ՀՀ և ԻԻՀ ղեկավարների, այլև այլ պաշտոնյաների միջև»,-ասաց նա:

Անդրադառնալով Իրանի դեսպանի՝ «Ղարաբաղի ադրբեջանական համայնքի» ներկայացուցչի հետ հանդիպմանը՝ Սարգսյանը նշեց, թե Ղարաբաղի «ադրբեջանական համայնքի» ղեկավարը նաև Հայաստանի օգնությամբ է լեգիտիմացվել: «Նրա կշիռը բարձրացվել է այն ժամանակ, երբ հայկական կողմը համաձայնություն է տվել, որ նա հանդիպումներ ունենա ԵԱՀԿ Մինսկի խմբի համանախագահ երկրների՝ Բաքվում հավատարմագրված դեսպանների հետ: Նախկինում նման հանդիպումներ չէին լինում, քանի որ չկար ՀՀ համաձայնությունը: Հիմա հայկական կողմը դեմ չի եղել, որ նման հանդիպում լինեն, և այն կայացել է»,-ասաց Սարգսյանը: