Կորոնավիրուսային հիվանդությամբ ծայրահեղ ծանր ու ծանր պացիենտների թիվը կրկին մնում է բարձր, գումարային՝ մոտ 650 հոգի
Կառավարության այսօրվա նիստին ՀՀ առողջապահության նախարար Արսեն Թորոսյանը ներկայացրեց կորոնավիրուսային հիվանդության իրավիճակը Հայաստանում։
«Շաբաթ օրն ունեցել ենք 577 նոր դեպք, կիրակի՝ 182 նոր դեպք, ընդհանուր դեպքերի քանակը դառնում է 32 հազար 151: Այս մասին կառավարության արտահերթ նիստին, երբ քննարկվում էր արտակարգ դրության ռեժիմը երկարաձգելու հարցը, ասաց ՀՀ առողջապահության նախարար Արսեն Թորոսյանը: Նա պարզաբանեց, որ կիրակի օրվա դեպքերի թիվը ցածր է, քանի որ թեստերը քիչ են արվել, ինչն էլ պայմանավորված է ոչ աշխատանքային օրով։
«Ծայրահեղ ծանր ու ծանր պացիենտների թիվը կրկին մնում է բարձր, գումարային՝ մոտ 650 հոգի, որից 43-ը միացված են թոքերի արհեստական օդափոխության սարքերին: Վերակենդանացման բաժանմունքները կրկին գրեթե ամբողջությամբ լիքն են, իսկ սովորական մահճակալներն ու թթվածնով ապահոված մահճակալները հարաբերականորեն ավելի քիչ լարված են։ Այս առումով ունենք շատ փոքր դրական դինամիկա»,-ասաց նա։
Արսեն Թորոսյանը հայտնեց, որ այսօրվա դրությամբ չկա տանը սպասող որևէ քաղաքացի, որը սպասում է հոսպիտալիզացիայի։ «Ունենք մեկ քաղաքացի, որը սպասում է տեղափոխման ոչ կորոնավիրուսային հիվանդանոցից դեպի կորոնավիրուսային հիվանդանոց»,-ասաց առողջապահության նախարարը, իսկ վարչապետ ՆԻկոլ Փաշինյանը նկատեց, որ այս շրջանում օրեր են եղել, որ մինչև 300 հոգու է հասել այդ թիվը:
Նախարարը կարևոր համարեց արտակարգ դրության ռեժիմի երկարաձգումը և նշեց. «Եթե այս շատ վաղ գնահատականներով այս կայուն և կայունից մի քիչ թեթևացող իրավիճակը պահպանվի, հնարավոր է այլ որոշումներ կայացվեն»:










