ԱԺ-ն քննարկում է առողջության հիմքով անաշխատունակ պատգամավորների գրավոր քվեարկության հնարավորությունը. ԱԺ նախագահը և փոխնախագահն առաջարկում են հնարավորություն տալ միայն կորոնավիրուսով վարակման դեպքում
Ազգային ժողովը քննարկում է «Ազգային ժողովի կանոնակարգ» սահմանադրական օրենքում լրացումներ կատարելու նախագիծը: «Իմ քայլը» խմբակցության պատգամավոր Վահագն Հովակիմյանը նշեց, որ առաջարկվում է ներդնել առողջության հիմքով ժամանակավոր անաշխատունակ ճանաչված պատգամավորների գրավոր քվեարկության կարգը:
Նա նշեց, որ ներկայումս կարգը գործում է միայն այն դեպքում, երբ ԱԺ-ի կողմից գործուղման մեջ է: «ժամանակավոր անաշխատունակության թերթիկի հետ կապված` խնդիր կա, ներկայիս գործող կարգավորումներով ՝ ընդունված անվանվող բժշկի թուղթը տրվում է ապաքինվելուց հետո, սակայն, քանի որ պատգամավորը ստիպված պետք է թուղթ ներկայացնի, որ ժամանակավոր անաշխատունակ է, այս պահին գործադրի հետ փորձում ենք հասկանալ` ինչպես այդ խնդիրը լուծել»,-ասաց նա:
ԱԺ նախագահ Արարատ Միրզոյանը նշեց, որ նախագծի նպատակը կորոնավիրուսի համաճարակի պայմաններում ԱԺ աշխատանքները չպարալիզացնելն է, և նշեց, որ իր կարծիքով` «ԱԺ կանոնակարգում» փոփոխությունը առավելագույնս պետք է հստակ լինի, տարընթերցումների առիթ չտա:
Վահագն Հովակիմյանը նշեց, որ գաղափարը առաջացել է կորոնավիրուսի պայմաններից ելնելով, սակայն արդարացի չեն համարել, որ երբ պատգամավորը առողջական այլ խնդիրներ ունի և պարտադրված է մնալ տանը կամ բուժհաստատություններում, նա զրկված լինի իր լիազորություններն իրականացնելուց, դրա համար իրենք խնդիրը դրեցինք ընդհանուր: «Եթե պետք է պատգամավորները օգտվեն նման գործիքներից՝ ի չարս, մեղմ ասած, դա մեր պետության, քաղաքական կյանքի ողբերգությունը կարող է դառնալ, և եթե կլինեն նման պատգամավորներ, հանրությունը պետք է տեսնի, որ կան այդպիսի պատգամավորներ, ինչը լավ ազդակ կլինի հաջորդ ընտրություններին այդ ուժին քվերակելիս»,-ասաց նա:
Արարատ Միրզոյանը շարունակեց, որ այս պահին կարծում է, որ պետք չէ այդպիսի ընդհանրական մոտեցում ցուցաբերել: «Դա հղի է տարբեր հնարավոր հետևանքներով, և պետք է կենտրոնանալ բացառապես կորոնավիրուսով վարակված պատգամավորների քվեարկության վրա»,-ասաց նա: Վահագն Հովակիմյանը նշեց, որ եթե կգտնվի ավելի լավ տարբերակ, հեղինակները կողմ կլինեն:
ԱԺ փոխնախագահ Ալեն Սիմոնյանը ևս նշեց, որ կարծում է, որ միայն հնարավորությունը պետք է տրվի կոնորավիրուսով վարակման դեպքում, և կարծում է, որ չպետք է ընդհանրացնել:










