Սերգեյ Շոյգուն Բաքվի նախաձեռնությամբ բանակցություններ է վարել Ադրբեջանի պաշտպանության նախարարի հետ. «ՌԻԱ Նովոստի»
ՌԴ պաշտպանության նախարար Սերգեյ Շոյգուն շաբաթ օրը հեռախոսազրույց է ունեցել Ադրբեջանի Պն նախարար Զաքիր Հասանովի հետ, «ՌԻԱ Նովոստի» -ին հայտնել է ռազմադիվանագիտական աղբյուրը:
«Շաբաթ առավոտյան Բաքվի նախաձեռնությամբ հեռախոսազրույց է տեղի ունեցել Ադրբեջանի պաշտպանության նախարար Զաքիր Հասանովի և ՌԴ պաշտպանության նախարար Սերգեյ Շոյգուի միջև։ Զրույցի ընթացքում քննարկվել են երկու երկրների ռազմական գերատեսչությունների փոխհարաբերություններին և համագործակցությանը վերաբերող տարբեր հարցեր»,- ասել է գործակալության զրուցակիցը:
Բացի այդ, նրա խոսքով, Շոյգուն Հասանովին տեղեկացրել է ուրբաթ օրը սկսված զորքերի մարտական պատրաստության հանկարծակի ստուգման մասին:
«Ռուսաստանի պաշտպանության նախարարն ընդգծել է, որ այդ միջոցառումը պլանային է և ոչ մի կերպ կապված չէ հայ-ադրբեջանական սահմանին տիրող իրավիճակի հետ»,- նշել է նա:
Ինչպես ավելի վաղ տեղեկացրել էր Tert.am-ը, Ռուսաստանի Դաշնության նախագահ, երկրի ԶՈՒ գերագույն գլխավոր հրամանատար Վլադիմիր Պուտինը կարգադրել է բանակի անսպասելի ստուգում անցկացնել: Այդ մասին հայտարարել է ՌԴ պաշտպանության նախարար Սերգեյ Շոյգուն:
Ստուգումը վերաբերում է Հարավային և Արևմտյան ռազմական շրջաններին, Օդադեսանտային զորքերին, Հյուսիային և Խաղաղօվկիանոսյան նավատորմերի ծովային հետևակին:
Շոյգուն մանրամասնել է, որ ստուգման շրջանակում կիրականացվի 56 մարտավարական զորավարժանք, որոնց կմասնակցի մոտ 150 հազար զինծառայող, ավելի քան 26 հազար միավոր տեխնիկա, 414 թռչող սարք, 106 նավ:
ՊՆ-ից հայտնել են, որ ստուգումն անցկացվում է բանակի պատրաստության մակարդակի գնահատման, ինչպես նաև զորամասերին և միավորումներին «Կովկաս-2020» զորավարժություններին մասնակցելու թույլտվություն տալու համար:
Հիշեցնենք, որ հուլիսի 12-ին՝ ժամը 12:30-ի սահմաններում, Ադրբեջանի զինված ուժերի զինծառայողները, անհասկանալի պատճառով, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք:
Հուլիսի 12-ին՝ ժամը 13:45-ին, Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել են հայկական կողմից և կորուստներ կրելով` հետ շպրտվել:
Ադրբեջանական կողմը հրետակոծությունը շարունակել է նաև հուլիսի 13-ին և 14-ին։ Հուլիսի 15-ին սահմանին իրադրությունը համեմատաբար հանգիստ է եղել։
Ըստ վերջին տվյալների՝ ադրբեջանական կողմը պաշտոնապես հաստատված 12 զոհ ունի, հայկական կողմը՝ 4: Կան վիրավորներ:
Լույս հուլիսի 16-ին՝ ժամը 03:40-ի սահմանում, Ադրբեջանի զինուժը ձեռնարկել է դիվերսիայի փորձ: ՀՀ ՊՆ մամուլի խոսնակ Շուշան Ստեփանյանը տեղեկացրել էր, որ դիվերսիայի փորձը կասեցվել է, և թշնամին կորուստ տալով հետ է շպրտվել:
ՊՆ մամուլի խոսնակ Շուշան Ստեփանյանն այսօր տեղեկացրել է, որ հայ-ադրբեջանական պետական սահմանին գիշերվանից մինչ այս պահը պահպանվել է հարաբերական անդորր։










