Ֆրանսիայում Սբ Պողոս-Պետրոսի տաճարում միտումնավոր հրկիզման փաստով հետաքննություն է սկսվել

17:54 • 18.07.20

Նանտի դատախազությունը հետաքննություն է սկսել Սբ Պողոս-Պետրոսի տաճարում միտումնավոր հրկիզման փաստով, որը բռնկվել է տեղական ժամանակով ժամը 7:30-ի սահմաններում, գրում է tass.ru-ն։

Նանտի դատախազ Պյեր Սենի խոսքով՝ «այժմ հիմնական վարկածը հրդեհի միտումնավոր առաջացման վարկածն է»:

Նա նշել է, որ տաճարում հրդեհի երեք օջախ է եղել։

Ավելի վաղ հաղորդվել էր, որ Ֆրանսիայի վարչապետ Ժան Կաստեքսը ՆԳ և մշակույթի նախարարությունների ղեկավարների ուղեկցությամբ կժամանի Նանտ՝ օրվա երկրորդ կեսին:

Տաճարի հրդեհի մասին ահազանգն ստացվել է տեղական ժամանակով ժամը 07:30-ին: Վերջին տվյալներով ՝ տեղում է 104 հրշեջ։ Կրակը տեղայնացվել է երեք ժամվա ընթացքում, սակայն դեռևս ամբողջությամբ մարված չէ։

Նանտում գտնվող Սբ Պողոս-Պետրոսի տաճարը համարվում է Ֆրանսիայի խոշորագույն գոթական տաճարներից մեկը: Դրա բարձրությունը 6 մետրով պակաս է Փարիզի Աստվածամոր տաճարից:

Այս տաճարը հրդեհվել է նաև 1972 թվականին: Դրանից հետո այն 3 տարով փակվել է՝ վերականգնողական աշխատանքների իրականացման համար: