Նոր գնած տուն էր ու հիմա այս վիճակում է․ չգիտենք՝ թույլ կտան այս տանը բնակվել, թե ոչ. Ռայնիսի շենքի պայթյունի հետևանքով տուժած բնակչի հարազատ (տեսանյութ)

12:21 • 26.08.20

Դեռ ոչնչից տեղակացված չենք, չգիտենք, թե հետագայում կացարան կտրամադրեն, թե ոչ: Այս պահին տեխնիկան աշխատում է: Այս մասին այսօր լրագրողների հետ զրույցում ասաց գազի պայթյունից մասնակի փլուզված շենքի բնակիչներից մեկի մայրը, նա նշեց, որ իր հարազատները պայթյունի ժամանակ տանը չեն եղել:

Հիշեցնենք, որ Քանաքեռ-Զեյթունում տեղի ունեցած պայթյունից փլուզված շենքի փլատակների տակ 56 տարեկան տղամարդ կա: Այս մասին լրագրողների հետ զրույցում ասել է արտակարգ իրավիճակների նախարար Ֆելիքս Ցոլակյանը: Նա նշել է, որ փլուզումից 3 քաղաքացի է տուժել, իսկ տարհանված 21 քաղաքացիները չեն վնասվել: Նրանց ցուցաբերվել է հոգեբանական աջակցություն։

«Հիմա չենք կարող տուն մտնել, մի պահ մտանք տուն, տեսանք, որ հատակը խախտված է: Բոլորս շոկի մեջ ենք: Մերը երրորդ հարկում է, պատուհանները նոր էին փոխված, ոչինչ չի եղել: Բարեբախտաբար ոչինչ չի եղել տանը, միայն հատակն է խախտվել, բայց դա արդեն քիչ չէ: Լավ է, որ նրանք տանը չէին, թե չէ տանը երեխա կարող էր լինել: Եղբայրս, երբ իմացել է պայթյունի մասին, շուտ հասել է՝ մտածելով, թե երեխաները տանն են, բայց չի իմացել, որ մեր տանն են եղել: Շոկի մեջ ենք, նոր գնած տուն էր ու հիմա այդ տունն այս վիճակում է ու չգիտես՝ թույլ կտան բնակվել, թե ոչ»,-ներկայացրեց նա:

Հիշեցնենք, որ այսօր ժամը 07:18-ին Ճգնաժամային կառավարման ազգային կենտրոն ահազանգ է ստացվել, որ Երևանի Ռայնիսի փողոցի թիվ 3 հասցեում գազի արտահոսքից տեղի է ունեցել պայթյուն, շենքը մասնակի փլուզվել է։