Լռություն էր հայտարարվել, որ զանգեին փլատակների տակ մնացած քաղաքացու հեռախոսին և գտնվելու տեղը ճշտեին, սակայն նա հեռախոսից բավականին հեռու է եղել. Ֆելիքս Ցոլակյան (տեսանյութ)
Փլատակների տակից դուրս բերված երրորդ անձը, ցավոք սրտի, մահացած էր, ցավակցում եմ մահացածի հարազատներին: Այս մասին լրագրողների հետ զրույցում ասաց արտակարգ իրավիճակների նախարար Ֆելիքս Ցոլակյանը:
Նա նշեց, որ լռություն էր հայտարարվել, որ զանգեին փլատակների տակ մնացած քաղաքացու հեռախոսին և գտնվելու տեղը ճշտեին, սակայն նա հեռախոսից բավականին հեռու է եղել: Մահացած քաղաքացին 56-ամյա Արթուր Ղազարյանն էր:
Հարցին, թե շենքի մյուս մասին վտանգ սպառնում է, թե ոչ, նախարարն ասաց, որ հիմա Քաղաքաշինության կոմիտեն դեպքի վայրում է և ստուգում են շենքի մյուս հատվածները:
«Սեյսմիկ ծառայությունից ստացած նախնական տեղեկություններով` առաջին, երկրորդ և երրորդ մուտքերն ամբողջովին ապահով են: Չորորդ մուտքի հետ կապված կասկածներ կան, որը պետք է նայեն, իսկ 5-րդ մուտքը փլված է: Ամբողջ շենքը տարհանված է, մի քանի ժամում պետք է որոշվի` ովքեր պետք է վերադառնան բնակարան, իսկ ովքեր են բնակարանից զրկվել, իրենց կացության հարցը կորոշվի այսօրվա ընթացքում, որևէ մեկը չի կարող դրսում մնալ»,-նշեց նախարարը:
Ֆելիքս Ցոլակյանն ասաց, որ չի կարող ասել, թե որն է պայթյունի պատճառը, հնարավոր է` գազի արտահոսք եղած լինի:










