Թրամփն ինքնագրեր է բաժանել երկրպագուներին՝ նրանցից մեկին ասելով, որ «այն 10 000 դոլարով կարող է վաճառել eBay-ում»
ԱՄՆ նախագահ Դոնալդ Թրամփը, որն օրերս այցելել է «Լաուրա» փոթորկի հետևանքով տուժած Լուիզիանա նահանգ, ինքնագրեր է բաժանել երկրպագուներին՝ նրանցից մեկին ասելով, որ «այն 10 000 դոլարով կարող է վաճառել eBay-ում», գրում է Daily Mail-ը։
Նշվում է, որ Սպիտակ տան ղեկավարը Լուիզիանա նահանգ է մեկնել, որպեսզի անձամբ գնահատի 4-րդ կարգի փոթորկի հասցրած վնասները և ծանոթանա դրանց արձագանքմանն ուղղված միջոցառումներին։ Պաշտոնատար անձանց և օգնության խմբերի առջև ելույթից հետո Թրամփը ինքնագրեր է բաժանել երկրպագուներին՝ նրանցից մեկին ասելով, որ «այն 10 000 դոլարով կարող է վաճառել eBay-ում»։
«Խնդրեմ, այս երեկո վաճառիր eBay-ում, և 10 000 դոլար կունենաս»,- ասել է նա։
Չնայած իր թանկարժեք ինքնագրերը բաժանելու առատաձեռնությանը՝ ԱՄՆ նախագահը չի այցելել փոթորկի հետևանքով տուժածներին, գրում է աղբյուրը՝ հավելելով, որ Սպիտակ տան առաջնորդն իր ստորագրության արժեքի վերաբերյալ խիստ լավատեսական պատկերացում ունի, քանի որ eBay-ում նրա ստորագրությամբ իրերը նախորդ տարիներին վաճառվել են ընդամենը մի քանի հազար դոլարով։
Հիշեցնենք, որ ԱՄՆ Լուիզիանա և Տեխաս նահանգներում «Լաուրա» փոթորկի հետևանքով զոհերի թիվը հասել է 16-ի։
«Լաուրա» փոթորիկն ամենաշատը վնաս է հասցրել Լուիզիանա և Տեխաս նահանգներին, որոնց սահմանակցում է Արքանզասը: Այս երեք նահանգներում փոթորկի հետևանքով ավելի քան 500 հազար բնակիչ առանց էլեկտրամատակարարման է մնացել։ Ըստ տարբեր գնահատականների՝ փոթորկի հասցրած վնասը կարող է հասնել միլիարդավոր դոլարների:













