Բաթումում պաստառներ են հայտնվել, որոնց վրա վրացական «Հայրենասերների դաշինք» կուսակցության առաջնորդները պատկերված են Պուտինի կերպարով (լուսանկար)
Վրացական Բաթում քաղաքում հայտնվել են BIMO կեղծանվամբ նկարչի ստեղծած նոր պաստառները, որոնց վրա նա պատկերել է «Հայրենասերների դաշինք» կուսակցության առաջնորդներ Իրմա Ինաշվիլիին և Դավիթ Թարխան-Մուրավիին ՌԴ նախագահ Վլադիմիր Պուտինի կերպարով: Այս մասին տեղեկացնում է netgazeti.ge կայքը:
Պաստառների վրա նկարիչը գրել է. «Հարկավոր է տեսնել երկրի դավաճանների իրական դեմքը»:
Այս կերպ նկարիչը պատասխանել է քաղաքում կուսակցության տեղադրած ընտրական ցուցանակի բովանդակությանը: Կուսակցական ցուցանակի վրա պատկերված Վրաստանի քարտեզում Աբխազիան, Հարավային Օսիան, ինչպես նաև Աջարիան նշված են կարմիր գույնով: Կուսակցության ներկայացուցիչների խոսքերով՝ դա նշանակում է, որ Աջարիան նույնպես բռնակցված է (Թուրքիայի կողմից):
Ցուցանակների բովանդակությունը հասարակական դժգոհությունների տեղիք է տվել, դրանք հանվել են ցուցարարների կողմից:
«Ես կտարածեմ այս պաստառները փողոցներում, շարունակելու եմ տարածել, որպեսզի շատ մարդիկ տեսնեն, թե ով եք դուք: Իրմա Ինաշվիլի, Դավիթ Թարխան-Մուրավի, նորմալ երկրում ձեր տեղն այլ վայրում կլիներ: Ինչ վերաբերում է մեր երկրի իշխանությունների արձագանքին. պարզ է, թե որքան եք վախենում արտահայտել նույնիսկ նորմալ քննադատական կարծիք»,-գրել է նկարիչը:
Պաստառները տեղադրվել են Բաթումի Աբաշիձե փողոցում:











