Մահվան ելքով վթարի մեղավոր դարձած Միխայիլ Եֆրեմովը դատարանում ընդունել է մեղքը․ մեղադրող կողմը 11 տարվա ազատազրկում է պահանջել

13:00 • 03.09.20

Մոսկվայում մահվան ելքով ճանապարհատրանսպորտային պատահարի մեղավոր դարձած դերասան Միխայիլ Եֆրեմովը դատարանում հայտարարել է, որ ընդունում է իր մեղքը, գրում է ՏԱՍՍ-ը։

«Ձերդ Գերազանցություն, ցանկանում եմ հայտարարությամբ հանդես գալ։ Ես արդեն մի քանի գիշեր է՝ չեմ քնել, որոշել եմ, որ ընդունում եմ իմ մեղքը»,- հայտարարել է դերասանը։

Դատախազության ներկայացուցիչը, իր հերթին, ապացուցված է համարել Միխայիլ Եֆրեմովի մեղքը։

«Կարծում եմ, որ հանցագործության մեջ Եֆրեմովի մեղքը հաստատվում է տեսանյութերով, փորձաքննություններով, վկաների ցուցմունքներով և այլ ապացույցներով»,-ասել է նա։

Դատախազի խոսքով՝ Եֆրեմովը ալկոհոլ է օգտագործել վթարից մեկ օր առաջ, վթարից առաջ նա եղել է Ulyss բարում։

«Տաքսի կամ սթափ վարորդ կանչելու փոխարեն նա նստել է իր մեքենան և ուղևորվել Մոսկվա», - ընդգծել է մեղադրող կողմի ներկայացուցիչը:

Նրա խոսքով՝ դերասանը նաև թույլ է տվել ճանապարհային երթևեկության մի շարք կանոնների խախտումներ, այդ թվում՝ գերազանցել է արագությունը։

Մեղադրող կողմը նաև պահանջել է Եֆրեմովին ընդհանուր ռեժիմի գաղութում 11 տարվա ազատազրկման դատապարտել։

«Խնդրում եմ ընդհանուր ռեժիմի գաղութում Եֆրեմովի համար 11 տարվա ազատազրկում սահմանել»,- հայտարարել է մեղադրող կողմը։

Հիշեցնենք, որ Եֆեմովի մասնակցությամբ ճանապարհատրանսպորտային պատահարը տեղի է ունեցել հունիսի 8-ին՝ Մոսկվայի Սմոլենսկի հրապարակում: Դերասանի վարած Jeep Grand Cherokee ավտոմեքենան դուրս է եկել ճանապարհի  հանդիպակաց գոտի և բախվել Lada մակնիշի մեքենային: Վթարի հետևանքով Lada-ի վարորդը մահացել է։

Ավելի ուշ դեպքի առիթով դերասանի դեմ քրեական գործ է հարուցվել։