Ռուսաստանում վարձակալած տարածք ունեմ, որի վարձը չեմ կարողանում տալ, այստեղ էլ վարկեր ունեմ, վեց ամիս չեմ կարողանում վճարել, տունս էլ ձեռքիցս կվերցնեն, մեքենաներն էլ, ո՞նց ապրեմ. ակցիայի մասնակից
Չեք կարողանում վերադառնալ օբյեկտիվ պատճառներով, որը պայմանավորված է համավարակով, այդ ուղղությամբ էլ բանակցություններ են վարվում, խնդրում եմ դիմեք ԱԳՆ-ին և պարետատանը, իրենցից պատասխաններ կստանաք, մենք սահման բացելու գործառույթ չունենք, կամ որոշելու՝ Ռուսաստանը ում է ներս թողնում, ում չի թողնում: Այս մասին կառավարության առջև հավաքված ՌԴ մեկնել ցանկացող քաղաքացիներին ասաց սփյուռքի հարցերով գլխավոր հանձնակատար Զարեհ Սինանյանը:
Հարցին՝ սա քայլ է, որ քաղաքացներին չթողնե՞ք արտագաղթեն երկրից, Սինանյանը պատասխանեց. «Ի՞նչ քայլ, ով ասաց, որ մենք չենք թույլատրում: Պարետատանն ու ԱԳՆ-ին հարցրեք՝ ինչ է արվում այդ ուղղությամբ, ես համոզված եմ, որ քայլեր արվում են»:
Բողոքող քաղաքացիներից մեկն էլ ասաց, որ Ռուսաստանում վարձակալած տարածք ունի, բիզնեսով է զբաղվում, փակել, եկել է, որ անձնագիր փոխի, հետ գնա, սակայն եկել, մնացել է: «Մայիսից բացվել է Մոսկվայում ամեն բան, աշխատում են մարդիկ, ես ոչ մի բան չեմ կարողանում վճարել այնտեղ, ինձ ասում են` արի կա'մ իրերդ հավաքի գնա, կա'մ վարձը տուր, ինչպե՞ս գնամ: Այստեղ վարկեր ունեմ, մինչև մարտ ամիսը ամբողջը վճարել եմ, մի օր ուշացում չեմ ունեցել, իսկ հիմա ոչ մի բան չեմ կարողանում վճարել, ո՞նց անեմ, ես ինչպե՞ս ապրեմ: 6 ամիս է` վարկ չեմ մուծում, ի՞նչ անեմ, տունս էլ ձեռքիցս կառնեն, մեքենաներն էլ, ի՞նչ անեմ»,- ասաց նա:
Ապա քաղաքացիները տեղեկացան, որ կառավարությունից ոչ ոք չի իջնելու իրենց հետ հանդիպման, քանի որ երկու օր առաջ է նախարարը հանդիպել իրենց: «Մեզ ասում են` երկու օր առաջ նախարարը խոսել է, հանդիպել է, հիմա ոչ ոք չի հանդիպելու: Չգիտենք՝ որքան ենք մնալու դեռ այստեղ, երկու օր առաջն ի՞նչ կապ ունի այսօրվա հետ: Չեն իջնի երևի, բայց շարունակելու ենք այստեղ մնալ դեռ»,- ասաց նրանցից մեկը:










