ՆԱՏՕ-ի գլխավոր քարտուղարը պահանջել է «թափանցիկ հետաքննություն» իրականացնել Նավալնիի հետ կապված իրավիճակը պարզելու համար

04:41 • 03.09.20

ՆԱՏՕ-ի գլխավոր քարտուղար Յենս Ստոլտենբերգը դատապարտել է «մարտական թունավոր նյութի կիրառումը» Ալեքսեյ Նավալնիի հետ կապված իրավիճակում և Ռուսաստանից պահանջել է «լիարժեք, թափանցիկ հետաքննություն իրականացնել»:

Ինչպես փոխանցում է ТАСС գործակալությունը, այս մասին Ստոլտենբերգը գրել է թվիթերյան էջում: «Գերմանիան հայտարարել է, որ Ալեքսեյ Նավալնիին «Նովիչոկ» նյութի կիրառմամբ հարձակման զոհ է դարձել: Կտրականապես դատապարտում եմ մարտական թունավոր նյութի կիրառումը, ինչն էլ ավելի անհետաձգելի է դարձնում Ռուսաստանի կողմից լիարժեք և թափանցիկ հետաքննության վարումը»,- գրել է դաշինքի գլխավոր քարտուղարը:

Հիշեցնենք, որ գերմանացի մասնագետներ այսօր ավելի վաղ հանդես էին եկել հայտարարությամբ՝ տեղեկացնելով, որ ռուս ընդդիմադիր գործիչ Ալեքսեյ Նավալնին թունավորվել է «Նովիչոկ» խմբին պատկանող նյութով:

Նավալնիին Օմսկի հիվանդանոցից Բեռլին էին տեղափոխել օգոստոսի 22-ին, որտեղ բժիշկները չէին բացառել նրա թունավորման տարբերակը, թեև Օմսկի հիվանդանոցի, ուր նրան հոսպիտալացրել էին օգոստոսի 20-ին, մասնագետները Նավալնիի օրգանիզմում որևէ թույնի հետք չէին հայտնաբերել: Հայտնի է, որ Նավալնին դեռ գտնվում է արհեստական կոմայի մեջ և միացված է թոքերի արհեստական օդափոխման սարքի: