Մինսկում՝ Լուկաշենկոյի նստավայրի մոտ, զրահափոխադրիչ մեքենաներ են տեղակայվել. այսօր բողոքի ցույցեր են անցկացվում Բելառուսի բոլոր մարզերում

17:57 • 06.09.20

Մինսկի Անկախության պալատի՝ երկրի նախագահ Ալեքսանդր Լուկաշենկոյի նստավայրի մոտ տասնյակ զրահափոխադրիչ մեքենաներ են կանգնած, որոնցում նաև զինվորականներ կան:  

Այս մասին հայտնում է РИА Новости-ն՝ նշելով, որ նստավայրի մոտ է գտնվում Բելառուսի Գերագույն դատարանի շենքը: Հարևանությամբ կայանվել է փշալարարեվ մեքենան: 

Կիրակի մայրաքաղաքում հանրահավաք են նախատեսում իրականացնել Լուկաշենկոյի հակառակորդները: Երկրի ներքին գործերի նախարարությունն այս առնչությամբ հայտարարել է, որ ոստիկանությունն ուժեղացված ռեժիմով վերահսկողություն է իրականցնելու անվտանգությունն ապահովելու նպատակով, ինչի համար հատուկ տեխնիկա է տեղակայվել քաղաքում:

Աղբյուրի տվյալներով՝ ուժային կառույցների ներկայացուցիչներն արդեն 5 երիտասարդի են ձերբակալել Հաղթանակի հրապարակի մոտ, որն, ինչպես ակնկալվում է, դառնալու է ընդդիմության կիրակնօրյա ցույցի հավաքատեղին:  

ТАСС գործակալության փոխանցմամբ՝ չարտոնագրված բողոքի ցույցեր այսօր տեղի են ունենում Բելառուսի բոլոր մարզերում:

Հիշեցնենք, որ ընդդիմադիրներն ու նրանց կողմնակիցներն ամեն օր բողոքի ցույցեր են իրականացնում օգոստոսի 9-ին կայացած նախագահական ընտրություններից հետո՝ բողոքելով արդյունքների դեմ, որոնց համաձայն հաղթող է ճանաչվել երկրի գործող նախագահը: