Վեներա մոլորակի ուսումնասիրությունն արդեն պետք է առաջնահերթություն լինի. ՆԱՍԱ-ի ղեկավար

ԱՄՆ օդագնացության և տիեզերական տարածության հետազոտությունների ազգային գործակալության` ՆԱՍԱ-ի ղեկավար Ջեյմս Բրայդենսթայնը կոչ է արել առաջնային ուշադրության տակ առնել Վեներա մոլորակի հետազոտական աշխատանքները:  

«Կյանք Վեներայի վրա՞: Ֆոսֆինի հայտնաբերումը բավականին նշանակալից զարգացում է Երկիր մոլորակի սահմաններից դուրս կյանքի առկայությունն ապացուցող փաստերի հայտնաբերման գործում»,- թվիթերյան էջում գրել է Բրայդենսթայնը և հավելել, որ Վեներայի ուսումնասիրությունն արդեն պետք է առաջնահերթություն լինի: 

Հայտնի է, որ Վեներա մոլորակի մթնոլորտում ֆոսֆին հայտնաբերել են Քարդիֆի համալսարանի (Մեծ Բրիտանիա) և Մասաչուսեթսի տեխնոլոգիական ինստիտուտի (ԱՄՆ) գիտնականները: 

Ինչպես ավելի վաղ հայտնել էր Tert.am-ը, բացահայտումն արվել է Հավայիներում տեղակայված աստղադիտակի և Չիլիի Ատակամա անապատում գտնվող մեծ ալեհավաքի օգնությամբ: Գիտնականների խոսքով՝ ֆոսֆինի մասնիկների կենտրոնացումը կազմում է 20-ը միլիարդի հարաբերակցությամբ:

Ֆոսֆինն անգույն և շատ թունավոր գազ է: Երկրի վրա այն արտադրում են անաերոբները, այսինքն՝ գոյության համար թթվածին չպահանջող միկրոօրգանիզմները: 2019 թվականին էկզոմոլորակների մթնոլորտներում ֆոսֆինի որոնումներ սկսել են իրականացվել հնարավոր կյանքի հետքեր գտնելու համար:

Life on Venus? The discovery of phosphine, a byproduct of anaerobic biology, is the most significant development yet in building the case for life off Earth. About 10 years ago NASA discovered microbial life at 120,000ft in Earth’s upper atmosphere. It’s time to prioritize Venus. https://t.co/hm8TOEQ9es

— Jim Bridenstine (@JimBridenstine) September 14, 2020