Եթե ՀՀ-ում գտնվող միջազգային կառույցները սահմանափակվում են միայն մտահոգություններ հայտնելով, թող գնան, այլ երկրում մտահոգվեն. հստակ քայլեր են պետք. ակցիա՝ ԵՄ դեսպանատան առջև՝ Արցախի ճանաչման պահանջով
Մի խումբ քաղաքացիներ բողոքի ակցիա իրականացրին ՀՀ-ում ԵՄ դեսպանատան առջև՝ պահանջելով ճանաչել Արցախի անկախությունը: Ընթերցելով ԵՄ-ին ուղղված ուղերձը՝ ակցիայի մասնակիցներից մեկը հայտարարեց, որ Արցախի անկախության միջազգային ճանաչումը հրատապ պահանջ է՝ հաշվի առնելով այն հանգամանքը, որ կանգնած ենք հումանիտար աղետի առջև:
«Դատապարտում ենք այն երկրների չեզոքությունը, որոնք փաստարկ են ներկայացնում, որ Արցախը ճանաչված չէ, և դրա արդյունքում մենք ունենք բազմաթիվ զոհեր ու վիրավորներ, այդ թվում՝ երեխաներ, կանայք, և հիմա դրված է իր պատմական հողերում գտնվող հայ բնակչության էթնիկ բնաջնջման վտանգը»,-ասաց նա:
Ակցիայի մեկ այլ մասնակից ընդգծեց՝ միջազգային կառույցները թող այլևս չհորդորեն ու մտահոգություն չհայտնեն Արցախում ստեղծված իրավիճակի համար, քանի որ հստակ գործողություններ են պետք:
«Մենք այսօր կանգնած ենք ոչ թե մտահոգություններ լսելու, այլ որոշակի գործառույթներ իրականացնող մարմիններին պահանջ ներկայացնելու, թե ինչ է կատարվում, և ինչ են նրանք պարտավոր անել: Եթե ՀՀ-ում գտնվող միջազգային կառույցները սահմանափակվում են միայն երկու կողմերին ուղղված կոչերով կամ մտահոգություններ հայտնելով, թող գնան, այլ երկրում մտահոգվեն: Այլևս չենք հանդուրժում նման վարքագիծը և պահանջում ենք պարզ գործողությունների շարք, որ բխում է այդ կառույցների պարտականություններից: Վերջացրեք ձեր կոչերը, անցեք հաջորդ փուլին, կատարեք վերլուծություններ, կոչեք իրերն իրենց անուններով և կատարեք կոնկրետ գործողություններ»,-ասաց ակցիայի մասնակիցներից մեկը:
Ակցիայի մասնակիցներից երեքին ԵՄ պատվիրակությունից ներս հրավիրեցին՝ ԵՄ դեսպան Անդրեա Վիկտորինի հետ հանդիպելու համար:
Ցուցարարները տեղեկացրին, որ բողոքի ակցիաները շարունակական բնույթ են կրելու, և այժմ էլ ակցիաներ են տեղի ունենում մի քանի դեսպանատների առջև, որ հնարավոր լինի համատեղ ջանքերով հասնել Արցախի ճանաչմանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Հոկտեմբերի 19-ի դրությամբ Արցախի զինուժը խոցել է հակառակորդի՝ 16 ուղղաթիռ, 23 ինքնաթիռ, 200 անօդաչու թռչող սարք, 576 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ: Հակառակորդն ունի ավելի քան 6309 զոհ։
Հայկական կողմից, նախնական տվյալներով, կա 729 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։ Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։










