Սիրիական դիտորդական կենտրոնից հայտնել են վերջին 48 ժամում հայերի դեմ կռվող սիրիացի վարձկանների շրջանում գրանցված կորուստների մասին
Մարդու իրավունքների սիրիական դիտորդական կենտրոնի (SOHR) ակտիվիստները վավերագրել են Լեռնային Ղարաբաղում հայերի դեմ կռվող թրքամետ սիրիացի վարձկանների շարքերում արձանագրված կորուստները:
Կենտրոնի տվյալներով՝ վերջին 48 ժամում 27 սիրիացի գրոհային է մահացել՝ թրքամետ գրոհայինների շրջանում մահացության ընդհանուր թիվը հասցնելով 161-ի: Նրանցից 92-ի մարմինները Սիրիա են ուղարկվել, մինչդեռ մյուսներինը դեռ Ադրբեջանում են:
Կենտրոնի աղբյուրները հայտնել են, որ վարձկանների նոր խումբ է պատրաստվում մեկնել Ադրբեջան, քանի որ Թուրքիան շարունակում է սիրիացիներին ուղարկել կռվի առաջնագիծ Լեռնային Ղարաբաղում:
Կիրակի կենտրոնի աղբյուրները հաղորդել էին, որ ավելի քան 400 գրոհայիններից կազմված նոր խումբ է ուղարկվում Ադրբեջան, սակայն նրանց տեղափոխումը հետաձգվել էր հրադադարի մասին պայմանավորվածության պատճառով:
Հիշեցնենք, որ սիրիական դիտորդական կենտրոնի տեղեկություններով՝ Ադրբեջանում գտնվող սիրիացի գրոհայինների թիվը գերազանցել է 2050-ը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 20-ի դրությամբ Արցախի զինուժը խոցել է հակառակորդի՝ 16 ուղղաթիռ, 23 ինքնաթիռ, 200 անօդաչու թռչող սարք, 576 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 6309 զոհ։ Հայկական կողմից, նախնական տվյալներով, կա 772 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։










