«Էրդողանը, մասնակցելով հարևան երկրներում հակամարտություններին, հույս ունի վերականգնել ազգային միասնությունը և խուսափել Թուրքիայի հետագա մասնատումից»․ New Europe
Թուրքիայի՝ ողբալի վիճակում գտնվող տնտեսությունը հանգեցնում է աղետի․ այդ երկրի տնտեսական վիճակը շատ ավելի վատ է, քան կառավարությունը պնդում է, և չկա գործազրկության և ընտանիքների եկամուտների հավաստի պաշտոնական վիճակագրություն։ Կառավարությունը նման թվերը գաղտնի է պահում, և դա բավարար է ցույց տալու համար, որ Թուրքիայում իրավիճակն իսկապես վատ է, գրում է New Europe թերթը։
Հոդվածագիր, լրագրող և գրող Վասիլի Կորոնակիի խոսքով՝ արդեն ավելի քան մեկ տարի է, ինչ Թուրքիայի տնտեսական և սոցիալական վիճակը վատանում է, և երկրի ամբողջ տարածքում միջին դասի ընտանիքները սկսել են ընտանեկան զարդերի զանգվածային վաճառք։
Թուրքիայի նախագահ Ռեջեփ Թայիփ Էրդողանը փակուղում է, որից նա չի կարողանում դուրս գալ։ Նա որոշել է միջամտել հարևան երկրներում ռազմական հակամարտություններին՝ կարծելով, որ այդպիսով կվերականգնի ազգային միասնությունը և կխուսափի Թուրքիայի հետագա մասնատումից՝ քրդական պետության ստեղծմամբ, որն այս կամ այն կերպ գտնվում է կայացման գործընթացում, գրում է նա։
«Էրդողանը զորքեր է տեղակայել Լիբիայում, Սիրիայում, Իրաքում, իսկ այժմ նաև Լեռնային Ղարաբաղում՝ ադրբեջանական զորքերի հետ միասին։ Վերջերս ներքին վերահսկողության պահպանմանն ուղղված հուսահատ քայլով Ռեջեփ Էրդողանը բարձրացրեց խաղադրույքները և ուղղակի առճակատման մեջ մտավ Եվրամիության հետ՝ ռազմական գործողություններով սպառնալով Հունաստանին, միաժամանակ նախազգուշացնելով մյուս երկրներին, որ «իրենց քաղաքներն այլևս անվտանգ չեն լինելու»,- նշում է հոդվածագիրը։
Նրա խոսքով՝ նախազգուշացումն անուղղակի էր, բայց ակնհայտորեն հասցեագրված է առաջին հերթին Գերմանիային, որտեղ բնակվող հինգ միլիոն մահմեդականներից չորս միլիոնը թուրքական ծագում ունեն և գտնվում են Անկարայի վերահսկողության տակ: Գերմանիայում կան բավարար քանակությամբ մզկիթներ և իսլամական մշակութային կենտրոններ և բոլոր իսլամական հոգևոր առաջնորդները գտնվում են Գերմանիայում թուրքական հյուպատոսարանների անմիջական հսկողության տակ:
Հոդվածագրի հաղորդմամբ՝ իրավիճակը, սակայն, այժմ հասել է բեկումնային կետի և «Վաշինգտոնին մոտ կանգնած աղբյուրների տվյալներով՝ չի բացառվում, որ մոտ ժամանակներս թուրք զինվորականները կարող են իրենց վրա վերցնել Էրդողանի ռեժիմի տապալման և ԱՄՆ-ի և ՆԱՏՕ-ի հետ թուրքական հարաբերությունների կարգավորման նախաձեռնությունը՝ խուսափելով երկրի մասնատումից և վերականգնելով նրա երկար ու դժվարին ճանապարհը դեպի Եվրոպա։ Սակայն դա իրադարձությունների զարգացման լավագույն տարբերակն է»։










