«Սա պարզապես պատերազմ չէ Ադրբեջանի և Թուրքիայի 10 անգամ ավելի մեծ բանակի դեմ, սա Հայոց ցեղասպանության մի նոր փորձ է». Տիգրան Ձիթողցյանը կոչ է անում միջազգային հանրությանը կանգնեցնել ագրեսորին

19:47 • 26.10.20

Հայտնի նկարիչ Տիգրան Ձիթողցյանը հերթական գրառումն է կատարել սոցցանցում՝ փորձելով իր բազմահազարանոց հետևորդների ուշադրությունը հրավիրել հայ ժողովրդի դեմ վարվող ցեղասպանական արշավին և կոչ անելով միջազգային հանրությանը կանգնեցնել ագրեսորին:

«Արդեն մեկ ամիս է, ինչ հայ ժողովուրդը հարձակման տակ է գտնվում, և ամբողջ ազգը պայքարում է ողջ մնալու իրավունքի և մեր հողի մի մասը պաշտպանելու համար: Սա պարզապես պատերազմ չէ Ադրբեջանի և Թուրքիայի 10 անգամ ավելի մեծ բանակի դեմ: Սա Հայոց ցեղասպանության մի նոր փորձ է Էրդողանի և նրա մարիոնետ Ալիևի կողմից, որոնք մեր դեմ են ուղարկում Սիրիայում և այլ երկրներում վարձած ահաբեկիչներին»,- գրել է հանրահայտ նկարիչը՝ ընդգծելով, որ Լեռնային Ղարաբաղի խաղաղ բնակչությունը դարձյալ ռմբակոծվում է՝ չնայած Վաշինգտոնում կնքված երրորդ հրադադարին: 

«Բռնապետները շարունակում են անել այն, ինչ նրանք արել են հայերի դեմ դարեր շարունակ և անպատիժ են մնացել: Քանի որ մենք նրանց ճանապարհին ենք կանգնած թրքախոս պետությունների ընդլայնման մտադրության իրականացման գործում: Քանի որ մենք քրիստոնյա ենք և գլուխ չենք խոնարհում: Ճիշտ չենք արդյո՞ք մենք, երբ պաշտպանում ենք մեր քրիստոնեական ավանդույթները, մեր դարավոր և առաջին քրիստոնեական եկեղեցիներն աշխարհում, մեր ժողովրդավարությունը, մարդկային իրավունքները, թե՞ պետք է փախչենք և տարածվենք աշխարհով մեկ, ինչպես դա տեղի ունեցած 105 տարի առաջ: Եթե 1915 թվականի Հայոց ցեղասպանությունը ճանաչված լիներ, Հոլոքոստը տեղի չէր ունենա, այսօր Էրդողանի այս գործելաոճն անհնար կլիներ: Այսօր Էրդողանն ունի նույն հավակնությունները, ինչ Հիտլերը: Նա փորձում է ներխուժել և ավերել ամենն, ինչ կարող է: Նայեք Սիրիային, Լիբիային, հաջորդը Հայաստանն է: Գերմանիայի ժողովուրդը չէր ֆաշիստը, ընդամենը 3 տոկոսն էր: Թուրքիայի ժողովուրդն էլ չէ, սակայն դուք պետք է տապալեք այդ խենթին և ժողովրդավարական երկիր կառուցեք, վերադարձրեք ձեր ազատությունը: Արթնացեք, կանգնեցրեք ագրեսորին»,- հավելել է Ձիթողցյանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 26-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 220 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6674 զոհ։ Հայկական կողմից, նախնական տվյալներով, կա 974 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն: