Իրանը չի վարանի գործել, երբ հարցը հասնի իր բնակիչների անվտանգությանը. իրանցի բարձրաստիճան գեներալ

14:03 • 28.10.20

Իրանի Իսլամական հեղափոխության պահապանների կորպուսի ցամաքային ուժերի հրամանատար, բրիգադային գեներալ Մոհամեդ Փակպուրը Լեռնային Ղարաբաղի հակամարտությունում ներգրավված հարևաններին նախազգուշացրել է, որ Իրանը չի հանդուրժի որևէ սպառնալիք իր սահմանային շրջանների և բնակիչների անվտանգության նկատմամբ, գրում է Tasnim News Agency-ին:

Իրանի Արդաբի նահագնում՝ հյուսիսարևմտյան սահմաններ կատարած այցի ընթացքում գեներալն ընդգծել է, որ Իրանը չի հանդուրժի որևէ սպառնալիք սահմանային գոտու անվտանգության և իրանցիների անդորրի խաթարման նկատմամբ:

Նրա խոսքով՝ Իրանը չի վարանի գործել, երբ հարցը հասնի իր բնակիչների անվտանգությանը: Հրամանատարն ընդգծել է, որ Իրանը երբեք չի ընդունի որևէ աշխարհաքաղաքական փոփոխություն իր սահմաններում՝ մեկնաբանելով դա որպես «կարմիր գիծ» Իսլամական հանրապետության համար:

Փակպուրը հավելել է, որ Իրանը կարող է ավելի շատ ստորաբաժանումներ տեղակայել հյուսիսարևտյան սահմանային գոտում՝ Հայաստանի և Ադրբեջանի միջև հակամարտության ֆոնին տարածաշրջանում անվտանգությունն ապահովելու համար:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 28-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 220 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6674 զոհ։ Հայկական կողմից, նախնական տվյալներով, կա 1068 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։