Բրիտանական հատուկ ծառայությունները սերտորեն համագործակցում են թուրքական հետախուզության հետ և անուղղակիորեն մասնակցում են Արցախի դեմ պատերազմին. Արման Նավասարդյան (տեսանյութ)
Ադրբեջանը հասկանում է՝ պատերազմը կանգնեցնելն այլևս անիմաստ է, նրանք ուզում են ամբողջ Արցախը՝ առանց հայերի, Էրդողանն էլ չի թողնի կանգնեցնել պատերազմը, դրված է Արցախի հայաթափման ծրագիրը. Արցախը փորձում են դարձնել տաբուլա ռասա՝ մաքուր հող, որի վրա ոչինչ չի լինի, ասում են՝ մեկ միլիոն փախստական կվերադառնա, մինչդեռ այնտեղ ընդամենը 43 հազար ադրբեջանցի է ապրել: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ նախկին փոխարտգործնախարար, արտակարգ և լիազոր դեսպան Արման Նավասարդյանը:
«Եթե հանձնենք Արցախը, կտանք նաև Հայաստանը: Արցախի ընդերքը հարուստ է ուրանով, Ադրբեջանն էլ ուզում է այնտեղ ատոմակայան կառուցել: Ռուսաստանը մատների արանքով է նայում այս ամենին: Էրդողանի թիվ մեկ խնդիրն այսօր միջուկային տերություն դառնալն է: Մեր այսօրվա հարացույցը պետք է լինի այն, որ պատերազմին այլընտրանք չկա, եթե մենք չհարվածենք Ադրբեջանի տարածքին, կպարտվենք»,- ասել է արտակարգ և լիազոր դեսպանը:
Ըստ Նավասարդյանի՝ միայն Գանձակի օդանավակայանին հարվածելը քիչ է, պետք է այդ քաղաքը մշտական թիրախի տակ լինի. «Պետք է բեկումնային հարվածներ հասցնել թշնամուն, Մռավի լեռնանցքով դուրս գալ Ռուսաստանի սահման, հարվածել Եվլախին: Պետք է Բաքու-Թբիլիսի-Կարս երկաթգծի հանգույցը վերացնել: Բրիտանական Մի-6-ը սերտորեն համագործակցում է թուրքական հետախուզության հետ և անուղղակիորեն մասնակցում Արցախի դեմ պատերազմին, Բորիս Ջոնսոնը հատուկ զգուշացրել է, որ պետք է ապահովել նավթամուղի անվտանգությունը»:
Նախկին փոխարտգործնախարարի կարծիքով՝ ԱՄՆ և ՌԴ նախագահները չեն ուզում կրակի դադարեցում սահմանել, բայց եթե ՀՀ-ն հարվածի տակ ընկնի, ՌԴ-ն իր խոսքը կասի. «Պետք է մոռանալ ՀԱՊԿ-ի մասին, հիմա աշխարհաքաղաքական վերադասավորում է գնում, ինչը հավանության է արժանանում, օրինակ, Մեծ Բրիտանիայի կողմից: Կարելի է նույնիսկ նավթամուղը շարքից չհանել, բայց հսկողության տակ վերցնել՝ բաժանելով Ադրբեջանը Ռուսաստանից: Կարևոր է նաև այն, որ Հայաստանից խմելու և ոռոգման ջրերն են գնում Ադրբեջան, պետք է կտրել այդ հոսքը»:
Արման Նավասարդյանի պնդմամբ՝ այսօր ՌԴ-ում մեծ կասկածանք կա Ադրբեջանի նկատմամբ, այդ երկիրն ինքնիշխան չէ, այն Թուրքիայի մի մասն է. «Տարիներ անց ՌԴ-ն կկանգնի խնդրի առաջ, պետք է անել նույն օպերացիան, ինչ Վրաստանում 2008-ին: Ադրբեջանը կարող է մասնատվել ազգային փոքրամասնությունների միջև: ՌԴ-ին այսօր բոլոր կողմերից շրջափակում են, Ղրղզստանում, Բելառուսում անկարգություններ են հրահրում: Ռուսներն իրենք են ընդունում, որ եթե Կովկասում չկանգնեցնեն ահաբեկիչներին, վաղը ստիպված կլինեն դա անել Կազանի մատույցներում»:
Արտակարգ և լիազոր դեսպանի պնդմամբ՝ այսօր Իսրայելը Վաշինգտոնի կարգադրությամբ Ադրբեջանը վերածել է ռազմական պլացդարմի, այն Իրանի դեմ է գործում: «Ադրբեջանում Իսրայելի հետախուզական և արբանյակային գործունեությունն ուղղված է Իրանի տարածքն ուսումնասիրելուն, Ադրբեջանն իսրայելական պլացդարմ է Իրանի քթի տակ: Մեր դիվանագիտությունը պետք է Իրանի ուղղությամբ շատ ակտիվ աշխատի, նրանց արձագանքը բավարար չէ»,- ամփոփել է ՀՀ նախկին փոխարտգործնախարարը:
Դավիթ Սարգսյան










