Արգենտինական քաղաքները միացել են հարավամերիկյան երկրներում կայացած ավտոերթին՝«Հանուն Արցախի ճանաչման» (լուսանկարներ)

21:07 • 02.11.20

Արգենտինայի տարբեր քաղաներում, ինչպես օրինակ՝ Կորդովայում, Ռոսարիոյում, Բուենոս Այրեսում, Մար դե Պլատայում, Տուկումանում, Նեուկենում և Բարիլոչեում, բնակվող հայերը միացել են հոկտեմբերի 31-ին Հարավյին Ամերիկայի մի շարք երկրներում կայացած ավտոերթին:

Ինչպես հայտնում է Diario Armenio պարբերականը, «Հանուն Արցախի ճանաչման և խաղաղության» խորագրով ավտոերթեր են տեղի ունեցել նաև Բրազիլիայում, Ուրուգվայում, Չիլիում: Միայն Բուենոս Այրեսում 900 մեքենա է մասնակցել ավտոերթին:

Արգենտինայում երթն ուղեկցվել է արգենտինական և հայկական օրհներգերի հնչյունների ներքո: Երթի վերջում ակցիայի մասնակիցները տեր հայր Հարյություն Սեփանյանի գլխավորությամբ արտասանել են «Հայր մերը»:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 46 քաղաքացիական անձ, վիրավորվել է 142 քաղաքացիական անձ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երեք անգամ հայտարարվել է մարդասիրական հրադադարի մասին, սակայն ադրբեջանական զինուժը խախտել է այն։