Վիեննայում տեղի ունեցած ահաբեկչության կասկածյալին ձերբակալել են Լինց քաղաքում
Վիեննայում տեղի ունեցած ահաբեկչության կասկածյալը ձերբակալվել է երկրի հյուսիսային Լինց քաղաքում: Ինչպես հայտնում է ТАСС գործակալությունը՝ հղում անելով ավստրիական Kronen Zeitung պարբերականին, ձերբակալվածին հանկարծակիի են բերել, և վերջինս դիմադրություն ցույց չի տվել:
Մյուս հրաձիգը վնասազերծվել է ոստիկանության կողմից նախօրեին: Նա «Իսլամական պետություն» ահաբեկչական խմբավորման անդամ էր:
Ոստիկանությունից հայտնել են, որ հրաձգությունն իրականացրել են մի քանի լավ զինված անձինք:
Վերջին տվյալների համաձայն՝ կատարվածի հետևանքով զոհերի թիվը հասել է 5-ի: Ստացած վնասվածքներից մահացել է 21-ամյա տղամարդ: Նա 4 փամփուշտ էր ստացել կրծքին:
Ներկա պահին 16 վիրավորներ հիվանդանոցներում են գտնվում, նրանցից ոմանց վիճակը ծանր է գնահատվում:
Ավստրիայի կանցլեր Սեբաստիան Կուրցն ավելի վաղ ժողովրդին դիմելիս տեսաուղերձի ժամանակ հայտնել էր 4 քաղաքացու մահվան մասին:
Հիշեցնենք, որ նախօրեին կրակոցներ էին հնչել ավստրիական մայրաքաղաքի կենտրոնական հատվածում գտնվող սինագոգի հարևանությամբ:










