Նիկոլ Փաշինյանն այլևս պարտության սիմվոլ է և մինչև չհեռանա, համերաշխություն չի լինի մեր երկրում․ Միքայել Մանրիկյան

15:47 • 24.11.20

Երևանի ավագանու «Բարգավաճ Հայաստան» խմբակցության ղեկավար Միքայել Մանրիկյանն այսօր ավագանու նիստի ժամանակ իր ելույթում ասաց, որ այս իշխանությունը հասարակությունը բաժանեց սևերի և սպիտակների, ներկաների և նախկինների, սակայն խրամատում կանգնած տղաների շրջանում նման բաժանում չի եղել։

«Հասկացեք, ձեր իշխանությունը ձախողել է ամեն ինչ, ինչ հնարավոր էր և հիմա կանգնել այստեղ և ասել՝ ընդունում ենք սխալը, դա սխալ է: Ձախողված և հողատու վարչապետը այլևս հանդիսանում է պարտության սիմվոլ և մինչև Նիկոլ Փաշինյանը չհեռանա, կարծում եմ՝ համերաշխություն չի լինի մեր երկրում»,- ասաց նա։

Միքայել Մանրիկյանը նաև ասաց, որ այս 2,5 տարվա ընթացքում իշխանությունը ժամանակ և հնարավորություն ուներ երկրում փոփոխություններ անել, սակայն տարբեր ոլորտներում առկա խնդիրները մնացել են չլուծված։

Ավագանու նիստի իշխանությունների գործունեությանն անդրադարձավ նաև ավագանու «Բարգավաճ Հայաստան» խմբակցության անդամ Մարկոս Հարությունյանը:

«Ինքս էլ պահանջում եմ վարչապետի հրաժարականը, մի պարզ պատճառով, որ ես ինքս պահեստազորի սպա եմ և երբևիցե պարտված հրամանատարի հետ չեմ կարող մտնել մարտի դաշտ արդեն պատրվողի հոգեբանությամբ»,– ասաց նա:

«Գոնե ինքս ինձ համար փոփոխություն եմ ուզում, որ թե՛ մարտական ոգին բարձրանա, թե՛ շատ հարցեր լուծվեն: Շատ եմ լսում մարդկանցից, թե պատերազմը ժամանակին չկանգնացրեց, ոչ մեկ չի մեղադրում պատերազմը կանգնեցնելու մեջ, բոլորը մեղադրում են նրան, երկիրն այս վիճակի հասցնելու մեջ»,- ասաց ավագանու անդամը:

Անդրադառնալով քաղաքի խնդիրներին, նա ասաց, որ նախկինում արված ինքնակամ շինությունները և ներկա օրերին արվողները չի կարելի նույն հարթության մեջ դիտարկել: Նա ասաց, որ իր սուբյեկտիվ կարծիքով` գույքահարկի թանկացումը տեղին չէ այս պահին: