Վատթարագույնին էլ ենք սպասում. ողջ լինի, զոհված լինի, իմ երեխուն պիտի գտնեմ. անհետ կորած զինծառայողի հայր (տեսանյութ)

16:50 • 24.11.20

Այսօր մեզ ոչ մի ռեալ բան չեն ասում: Ասում են՝ սպասում ենք՝ ռուսական զորքը մտնի, Կարմիր խաչը մտնի: Մեզ պետք է, որ մեր երեխաներից մի նորություն տան: Այս մասին Կառավարության դիմաց Tert.am-ի հետ զրույցում ասաց անհետ կորած զինծառայողների ծնողներից մեկը՝ նշելով, թե վերջին անգամ որդու հետ խոսել է հոկտեմբերի 5-ին:

«Ռուսական զորքը չի գնալու մտնի ծառերի տակ, փնտրի: Կարող է մի տան մեջ, մի փոսում, մի բունկերում մեր երեխեքից վիրավորվել են, թաքնված են եղել: Մեր զորքից անպայման պետք է մտնեն, որ կարողանան գտնել»,- ասաց նա՝ նշելով, թե հավատում է, որ ողջ մնացածներ կլինեն:

«Հասկանում ենք, պատերազմ է, վատթարագույնին էլ ենք սպասում, բայց մեր երեխեքին պիտի գտնենք: Ես ասել եմ՝ պետք է իրենց հետ մտնեմ Ջաբրայիլ, իմ երեխուն գտնեմ, ողջ կլինի, զոհված կլինի, իմ երեխուն պիտի գտնեմ»,-նշեց նա:

Հիշեցնենք, որ արդեն մի քանի օր է, ինչ անհետ կորածների և գերեվարվածների հարազատները բողոքի ակցիաներ են անում Պաշտպանության նախարարության, Կառավարության դիմաց։ Կառավարության մամուլի ծառայությունը երեկ տեղեկացրեց, որ գերեվարվածների վերադարձի, անհետ կորածների ճակատագրերի պարզաբանման աշխատանքները համակարգելու նպատակով ձևավորվել է միջգերատեսչական աշխատանքային խումբ։