Ֆրանսիան միկրոչիպերի օգնությամբ բարձր մտավոր ունակություններով, ցավադիմացկուն և սթրեսակայուն զինվորներ կստեղծի․ Daily Mail

Ֆրանսիան միկրոչիպերի օգնությամբ բարձր մտավոր ունակություններով, ցավադիմացկուն և սթրեսակայուն զինվորներ կստեղծի, գրում է Daily Mail-ը։

Երկրի զինված ուժերի նախարարության էթիկայի կոմիտեն հավանություն է տվել այդ ուղղությամբ աշխատելու նախագծին, «որպեսզի Ֆրանսիան հետ չմնա այն երկրներից, որոնք արդեն աշխատում են նման նախագծերի վրա»:

Նշվում է, որ միկրոչիպային իմպլանտատները նախատեսված կլինեն «ուղեղի ունակությունների բարելավման» համար։ Գիտնականները նաև ձգտում են ստեղծել իմպլանտատներ, որոնք թույլ կտան բանակի հրամանատարական կետերին հետևել իրենց զինվորների շարժին և իմանալ նրանց գտնվելու վայրը, փորձ է արվում նաև ստեղծել դեղեր, որոնք զինվորներին ցավադիմացկուն կդարձնեն։

Նաև ուսումնասիրություններ են կատարվում զինվորներին երկար ժամանակ արթուն պահող հաբերներ ստեղծելու և լսողությունը բարելավելու համար վիրահատություններ իրականացնելու ուղղությամբ։

Ֆրանսիայում մտավախություն ունեն, որ ֆրանսիական բանակը կարող է հետ մնալ այլ երկրների բանակներից, որոնք արդեն նման ոլորտներում սկսել են հետազոտությունները։

Զինված ուժերի նախարար Ֆլորենս Պարլին հայտարարել է, որ Ֆրանսիան չի պատրաստվում անմիջապես միկրոչիպեր փոխպատվաստել իր զինվորներին: