Շվեդիան և Դանիան դադարեցնում են Moderna պատվաստանյութի օգտագործումը 1991 թվականից հետո ծնվածների համար

Շվեդիայի և Դանիայի իշխանությունները դադարեցնում են Moderna-ի հակակորոնավիրուսային պատվաստանյութի օգտագործումը 1991 թվականից հետո ծնված մարդկանց համար: Դա պայմանավորված է հազվադեպ հանդիպող կողմնակի ազդեցությունների առաջացմամբ, ինչպիսիք են միոկարդիտը, հաղորդում է Reuters-ը:

Շվեդիայի առողջապահական գործակալության տվյալները վկայում են պատվաստված երիտասարդների շրջանում միոկարդիտի և պերիկարդիտի դեպքերի տարածվածության մասին:

«Կապը հատկապես ակնհայտ է դառնում, երբ խոսքը վերաբերում է Moderna Spikevax պատվաստանյութին, հատկապես երկրորդ դեղաչափի ներարկումից հետո», - ասվում է գործակալության հաղորդագրության մեջ:

Միևնույն ժամանակ, նշվում է, որ այդ կողմնակի ազդեցությունների զարգացման ռիսկը, այնուամենայնիվ, շատ փոքր է: Այնուամենայնիվ, գործակալությունը այժմ խորհուրդ է տալիս երիտասարդներին ստանալ Pfizer/Biontech-ից Comirnaty պատվաստանյութը: