Ինձ անհանգստացնում են մարդկանց հումանիտար անկայուն պայմանները. Հռոմի պապն անդրադարձել է Արցախի շրջափակմանը

17:25 • 18.12.22

Հռոմի պապ Ֆրանցիսկոսը մտահոգություն է հայտնել Լեռնային Ղարաբաղում տիրող հումանիտար իրավիճակի կապակցությամբ, գրում է Vatican News-ը՝ հիշեցնելով, որ խոսքն Արցախը Հայաստանին կապող միակ ճանապարհի՝ Լաչինի միջանցքի փակման մասին է:

Կիրակի Հռոմի պապ Ֆրանցիսկոսը բոլոր կողմերին կոչ է արել գտնել «խաղաղ լուծումներ՝ հանուն ժողովրդի բարօրության»։ Հռոմի պապն ասել է, որ «անհանգստացած է Հարավային Կովկասում Լաչինի միջանցքում ստեղծված իրավիճակով»։

«Ինձ անհանգստացնում են մարդկանց հումանիտար անկայուն պայմանները, որոնք ձմռանը գտնվում են իրավիճակի հետագա վատթարացման վտանգի առաջ», - ասել է պոնտիֆիկոսը:

Աղբյուրը հիշեցնում է, որ շուրջ 120 000 հայ, այդ թվում՝ 30000 երեխա ճանապարհի փակման հետևանքով մեկուսացվել է աշխարհից և զրկվել սննդից, դեղորայքից և առաջին անհրաժեշտության պարագաներից:Հաղորդվում է, որ ընտանիքները բաժանվել են, և շատերը չեն կարողանում հասնել Հայաստան՝ համապատասխան բուժօգնություն ստանալու համար:

Եվրամիությունը կոչ է արել Ադրբեջանին ապահովել Լաչինի միջանցքով տեղաշարժի ազատությունն ու անվտանգությունը՝ համաձայն 2022 թվականի նոյեմբերի 9-ին Ռուսաստանի, Հայաստանի և Ադրբեջանի կողմից ստորագրված եռակողմ փաստաթղթի։

ԵՄ պաշտոնյաները նախազգուշացրել են, որ միջանցքի արգելափակումը զգալի դժվարություններ է առաջացնում տեղի բնակչության համար և կարող է հանգեցնել լուրջ հումանիտար արտակարգ իրավիճակի: