Եթե աշխարհը թուլացնի աջակցությունն Ուկրաինային, Պուտինը կօգտագործի ցանկացած զենք. Զելենսկին՝ միջուկային զենքի օգտագործման մասին

18:50 • 18.12.22

Եթե ՌԴ նախագահ Վլադիմիր Պուտինը ցանկանա միջուկային զենք կիրառել, նա կօգտագործի այն, անկախ նրանից, թե Ուկրաինան ինչ քայլեր է ձեռնարկում։

Ինչպես նշում է ՌԲԿ «Ուկրաինա»-ն՝ այս մասին ասել է երկրի ղեկավար Վլադիմիր Զելենսկին՝ ֆրանսիական TF1 և LCI հեռուստաալիքներին տված հարցազրույցում։

«Եթե Պուտինը ինչ-որ պահի որոշի միջուկային զենք օգտագործել, դա կախված չի լինի նրանից, թե արդյոք Զելենսկին ցանկանում է հետ վերցնել Ղրիմ», - ասել է նախագահը՝ ևս մեկ անգամ շեշտելով, որ դա կապված չէ Ուկրաինայի քայլերի հետ։

«Պուտինը, եթե ցանկանա միջուկային զենք օգտագործել, կօգտագործի այն... Պարզապես չի կարելի վստահել մարդկանց, որոնք ինչ-որ բան են ասում, բայց վարվում են այնպես, ինչպես իրենք են որոշել»,- ասել է Զելենսկին։

Նա նշել է, որ Պուտինը գործում է այնպես, ինչպես իրեն հարմար է։

«Եվ եթե աշխարհը թուլացնի աջակցությունն Ուկրաինային, նա կօգտագործի ցանկացած զենք»,- հավելել է Զելենսկին։