Քիլիան Մերֆին «Օպենհայմեր» ֆիլմում իր կերպարին հնարավորինս շատ նմանվելու համար «օրական ընդամենը մեկ նուշ» է կերել (լուսանկարներ)

Միջուկային զենքի մշակման առաջին փուլերը գլխավորած ամերիկացի ֆիզիկոս Ռոբերտ Օպենհայմերի կյանքի պատմությունը ներկայացնող ֆիլմում գլխավոր հերոսին մարմնավորած Քիլիան Մերֆին իր կերպարին արտաքնապես հնարավորինս շատ նմանվելու համար «օրական մեկ նուշ» է կերել:

Ինչպես գրում է Daily Mail-ը, 47-ամյա Մերֆին ռեժիսոր Քրիստոֆեր Նոլանի «Օպենհայմեր» ֆիլմում մարմնավորել է «ատոմային ռումբի հորը»՝ ֆիզիկոս Ռոբերտ Օպենհայմերին, որն իրական կյանքում բավականին նիհար է եղել:



Մերֆիի խաղընկերուհին՝ Էմիլի Բլանթը, որը մարմնավորել է գիտնականի կնոջը՝ Քիթիին, պատմելով դերասանի խիստ սննդակարգի մասին, ասել է, որ նա ընդամենն օրական մեկ նուշ էր ուտում:

«Դա այնպիսի լուրջ մոտեցում էր: Նա ամեն օր միայն մի նուշ էր ուտում: Նա այնքան էր հյուծվել», - պատմել է Բլանթը:



Մերֆին ևս պատմել է կտրուկ ֆիզիկական փոփոխությունների մասին, որոնցով անցել էր: Նա նաև խոստովանել էր, որ իր այս կերպարանափոխությունը «առողջ» չէր:

New York Times-ի հետ զրույցում դերասանը պատմել է, որ նկարահանումների մեկնարկից հինգ ամիս առաջ սկսել է ֆիզիկապես և էմոցիոնալ առումով պատրաստվել դերին:



«Ես սիրում եմ մարմնով ևս համապատասխանել կերպարիս, իսկ Օպենհայմերն ուներ շատ հստակ ուրվագիծ, որը ես ուզում էի ճիշտ ներկայացնել: Ես ստիպված էի բավականին նիհարել... Նա շատ նիհար էր, գրեթե հյուծված, գոյատևում էր «Մարտինի»-ով և ծխախոտով», - նշել է դերասանը:

Մերֆին նաև պատմել է, թե ինչպես է դերին պատրաստվելիս փորձել, թե որքան քիչ կարող է ուտել՝ խոստովանելով, որ խորհուրդ չի տալիս նման էքստրեմալ սննդակարգը:

Սակայն դերասանը չի ցանկացել հստակ բացահայտել, թե որքան քաշ է կորցրել դերի համար: